E totus custos frades nostros, mortos
solos in una gherra mai bida,
chena mancu àer àpidu aconortos

in s‘ora de s’issoro dispedida…
an a lòmper in paghes a sos portos
chi sonniadu aian tota vida?

Donzi ambulanza notena, che nae
lughet s’iscuru e nos lassat pintare
cun s’umbra de sa manu alas de ae

in muros d’aposentos a cansare,
che in trincea, unu chelu grae.
Inter dolos e tzèrrimu punnare

donzunu ‘e nois est che fante avesu
a crèere nemigu cada anzenu,
cando, pro sorte avversa, ruttu in mesu

a malas frinas, bastat un alenu
curtzu a t’intender’ belle che arresu.
E cussos coros a repicu lenu

ch’a màchinas d’osìzenu sun presos?
Pesan cun atza sas ùltimas ridas
de ispera a sanare, nende resos

in alìdos de laras mesu nidas,
comente frores de fide muntesos
bios a crebu de sùrviles lidas.

No ischimus si custa gherra noa
at a durare. Ne si pro frimmare
s’unca nos bastet cras comente doa

bestire caratzeddas subra nare:
àtera timo èssere sa proa
chi s’òmine epat s’òbrigu de dare.

Gai, borto su pensu a giajos mios:
s’atza issoro de fantes in su ludu
m’est, in custas diadas de affios,

aconortu agradèschidu e fungudu.
E pro lassare prus fortzas e brios
a frades nostros in su fronte, mudu

isto in custu cuzone de trinceas
e, iscrètidu e chena cumandante,
iseto noas d’àteras peleas
dae sa boghe de Ràdio-fante.

Menzione d'onore al 30° Concorso di poesia in Lingua Sarda “Sant’Antoni de su o’u” - Mamoiada 06 Marzo 2021