Refertu medicu
de Francesco Castia

Una Signora de onesta figura,
giughet pro consultare a su Duttore
in brazzos suos una criadura
denutrida e de pallidu colore.

Su Duttore pienu de premura
pensat de visitare cun rigore
su sinu ‘e sa signora, chi s’iscura
mustrat a malu coro pro pudore.

Poi mes’ora chi fit visitada,
su Duttore li nat, sa maladia
esistit ca vostè latte no hada!…

Pronta issa narat cun tanta ironia:
dae atera zente sò mandada
sa criadura no est fiza mia!

07-1951