Rena.

L’isco chi su tempus est currinde
e sa rena in cuss’ampulla
oramai est finida,
o pagu,
pagu meda bi nd’at restadu.

Però la chelzo
finas a s’ultimu ranu
bona o mala chi siat,
sa rena ch’est mia,
ca cun issa e, in issa
m’at trazadu su entu
in giogos de fortuna,
si puru apo piantu
e puru m’an tocadu
istiddios de lagrimas anzenas.

Frimmadi rena
e pius non fales,
frimmadi in custas manos bias
chi ancora an forza,
e ancora lu disizan
su entu chi ischiat de ’eranile,
inghiriende
e carignendemi in cara,
tebiu e amigu.

Frimmadi rena,
non fuas, lassami narrere,
lassa chi tota siat iscrita
cust’istoria mia,
e finas a cantu narat de amore,
o amore ides in custu coro,
tue frimmadi
e faghemi cumpagnia.

Franco Piga (Romana ‘SS’)