Ribàttida 'e marettada (*)

di Benito Saba (2004)

Unda chi 'enis…
unda!...
chi andas…
unda...
chi torras…
unda!...
chi pigas…
unda...
chi falas,,,
unda!...
chi ascias…
unda...
chi rues!
Unda!... unda rotunda… tunda!...
Unda subra sas roccas,
unda in sas arenas,
unda de marea profunda…
Arcana balia as tue, unda…

De a tie m'infunda, 'isos meos arrunda,
dogni tristura munda, anneos affunda,
s'anima angulosa attunda,
s'unca isfunda, de asseliu e paghe abbunda,
su coro meu tzircunda, intunda,
intro a tie isoltu mi cunfunda…

Tue sempre ses inoghe, unda.
A manzanu, pitzinnu, unda pitzinna,
gioghende m'as imparadu
atza e frea e assentu...
in s'oru 'e sa vida…

Tempus chi colat…
Tempus.
Annu chi passat…
Annu. E lompen annos.
Die chi fuit...
Die. E sighin dies.
Die pro die…
Unda pro unda...

Est sero.
Die repetit die...
Unda rebattet unda.

Benito Saba

(*) Risacca dopo la mareggiata

Questa poesia ha conseguito il SECONDO PREMIO - Sezione Poesia senza rima - al XVI CONCORSO DI POESIA SARDA - ACLI DELLA SARDEGNA - 2004