Ite sun custas rimas insistentes
chi gira-gira inghirian sa mente,
tochende sos ammentos, su presente
e sighin, nara-nara, impertinentes.

M’invitan carignosas a su giogu
pedinde a sos sentidos poesia,
sa matessi connota in pitzinnia
cando fin bios gustu e disaogu.

Cudda chi cun antiga galania
apo sempre tratadu cun rispetu,
l’apo dadu pensares e afetu
e de sos bisos tota sa zenìa.

Ma como, a lampalughe si presentat
e luego si ch’andat, fue-fue,
la tenìa a costazu, fit totùe,
sa chi oe, atesu ch’argumentat.

Oh! Rimas, non bidides s’aridesa
chi tempus cun su fadu m’an lassadu?
Amore, isperas, totu s’an furadu
lendemi de su coro sa richesa.

Morin in laras totu sas cantones
chen’agatare sonu e armonias,
pius non chircan versos, dilighias
non pessighin bideas, passiones.

Ne consolan sas dies solianas
chi tebiore tzedin regadiu
a su coro chi isetat, ca est biu,
mancari a pesarue in sas matanas.

Sucutat lastimosu in cust’iscuru
peraulas chi morin mudas-mudas,
nendemi de angustìa, penas, dudas.
Chi sian poesia cussas puru?

(2012)