Ripitis

Sichis a ripitere
chi cheres torrare
a sa domo 'e su Grumene,
a sa corte manna
ube contabamus sas dies
in su zaraballu 'e Barbanera,aisettande...
de si prenare sas puas
a pesare famillia
a falare lentas sas primas fozas.
Mi dimandas de su furru
garrigu de pane arrujau,
de sa ziminera prena de fari-fari
e de iscarcallios, tra ziros de binu
cantos,brullas de mannos
bolos de pizinnos:
sichis a mi dimandare!
Ma fritta e serrada est sa domo,
solu solidàe, che lepiu prughereddu
in sas cadiras rucràdas in terra
in su puttu siccu
in d'unu surbile 'e bentu
chi non connosches prus
chi colat tra pacos jocos
ispartinaos in terra
chi sonan, galu
in su coro, in sa mente tua
de mama.

Rosario Porcu (Nuoro)