Rosa poesia
de Tonino Fancello

Beni che isposa arcana poesia
settiti in coa ca mi parzo assentu
Faeddàmi in lampos interi su entu
porrimi in carchi musa un'ermosura
istura grobes dae sa seportura
chi mi preguntet cada fantasia.

Dae sa funtana chi t'ido perenne
cantaros cherzo prenos de cuffortu
intas in versos chi lacan'a tortu
mustrami in cada musa sa maghia
e si cumprendes custa vida mia
m'istringhes a su sinu a mi tratenne.

Jeo chi ti chirco cherzo su diritttu
de ti posare inoche carch'iscutta
Chilliami s'anima si paret rutta
e pastina sos versos in su coro
isterremi in sas campuras de oro
sos versos de ispica 'e custu sittu.

Ti pesso settia in arenas de mare
chin mill'isteddos chi rundan'a tie
intro su versu e intritzin in sa die
donzi valore de sa terra anzena
che un' emigrante c'alleviat sa pena
m'intendo si tue pasas su colare.

Che filumena cantami in cust'ora
canzones betzas chi son'in s'armanzu
de cantadores fortes de attarzu
ch'ichintiddana versos de arghentu
t'aperzo una ventana in s'aposentu
intra balente bella e gherradora.

Rosa poesia ghettami su mantu
fattu de frases de sedas de luna
chirco sa luche interi sa fortuna
t'ido rundande in pittu 'e sas aeras
sona chin s'arpa custas camineras
ricamami sa vida chin s'incantu.

Bussa ca carta chin sa manu 'orte
in custa mesa joco sas isperas
pica su picche...lassa sas chimeras
son de su poeta...son de custa corte.

Mentzione di merito al "Quartucciu 2011"