Ispozados d’isperas e promintas
milli Gristos ponende sun in rughe;
rantzigos istriores dat sa lughe
e a chelu si pesan manos bintas:
manos boidas ch’isettan vaghe vaghe
in fainas d’istimas e de paghe.

Ma su travallu istat moribundu
e non s’agattat cura a su dolore.
Che pantama niedda, su timore,
inghiriadu at tottu su mundu
e punghet cun ispinas d’iddighìa
custa disamparada terra mia.

An post’in rughe mannos e minores
cun sa belles’issoro e cun s’arcanu;
los an postos in rughe su manzanu
cand’in bolu si pesan sos astores
chi morini sos bisos de sa zente
cun faghere luntzin’e prepotente.

E post’in rughe ana sa zustissia
cando cun nois si sun accanidos.
Sos anghelos custodes sun fuidos
isprasumados de tanta malissia
e in carrera misera e famida
arrancana sos bintos de sa vida.

In custa terra “d’omines” gattia
chi inchietesa e alinu m’at dadu
su riscattu dae meda sonniadu
jughet sa cara de s’ispetatia
chi de boidu pienat donzi pessu
ermosuras zirand’a su rovessu...

Isetto e biso, ojos e s’aera,
tra custa zente mia impoverida
che carva dae sos bentos irfozida
chen’incunza, ne limba, ne ispera:
in su seru ’e sa vida ch’est dolore
ma lughe noa istrinat donni’arbore...

Menzione al 23º Concorso di Poesia in Lingua Sarda “Sant’Antoni de su o’u” – Mamoiada 17-01-2014