S’amore cambiadu in odiu
Cumpostu pro usu e consumu de sa gioventude
di Bartolomeo Serra

Duas paraulas a sos benignos lectores

A cale iscopu este dirigida sa pubblicassione de i custas cantones in Sardu Lodugoresu? Ecco sa domanda, chi mi paret siant pro si fagher fazilmente dai sos Corteses Lectores appenas leadu in manu custu fasciculu. Essende una tale dimanda pius che legittima, creo opportunu darelis'una breve risposta.
S’intitulassione de s'Opusculu, chi fattu de publica rejone, indicat già da i per issa e tottu s'oggettu, e i sos motivos, sos quales m'han determinadu a lu componner. Permesu dei custos cantigos populares, sa povera Musa mia, notat, aih! canto tristas e malinconicas, cantat. Non già sas eroicas impresas de valorosos gherreris, sos quale, in sa patria battaglias si sunt incoronados de gloria immortale, et hant illustradu s'epoca insoro, benesi sas malas avventuras da un’amore traitu, s’incostanzia de una infede amante, sa quale poi de haer cun sas attrattivas de su dulze risu, e lusinghevoles vezzos impignadu tottu sos affettos de su coro meu, già appassionadu de su pius puru, e virgine amore pro Issa, mentres sonniaia cuddos annos de vida felize, inseparabiles dai s'unione de duos coros, chi sinzeramente s'amana. Ahi' Ahi! troppu ingrada a tantu affettu mattirat traitorias e ingannos a traitoria e ingannos tales chi m'hant fattu sa mente reggirare, et proare tottu sos dolores de su pius amaru disingannu, chi avvelenendemi sas puras gioias de sa vida giovanile, forsis mi renden infelize pro sempre, e i su ch'est ancora pius penosu est chi tales ingannos mi tramesit senza li dare un umbra de suspettu. Ah! crudele... sas promissas tuas non fin custas, ne fit custa sa paga de mi dare pro sa quale troppu vivamente feridu, s'affettu forte, e i s'amore ardente chi l'haia s'est de botu cambiadu in «odiu implacabile»; ne podiat esser diversamente, già ghi mastru de s'Odiu est s'Amore segundu s'espressione de su famosu Cantore de su Cainu, chi narat: Nella scuola d'amor l'odio s'impara; — e de unu modernu poeta sardu su quale iscriet: Cando indun'amadore

Atteru che amore non s'intendet
Pius forte est s'Amore
Pius Ardente s'odiu s'azzendet.

Ecco adducas in breve s'argumentu de sas mischinas poeticas produssione chi bos presento amigos lectores:

S’amore cambiadu in odiu

Ne cretedes chi a dare a s'istampa cust'umile regolta de poesias in dialettu sardu, m'hapata movidu s'ambissione de m'acquistare fama de poeta, o sa vana gloria d'esser zelebradu comente scrittores; mi liberet Deus dai su pensare solamente, proite isco bene chi s'elevadesa de su talentu meu est tantu bascia de non poder pretendere s'innalzeta bolos troppu altos e repentinos ancora cherfendelu, a sos quales solen sos prezipizios esser vicinos, custas sunt scrittas pro usu e consumu de sa gioventude de su sessu forte chi pensat leare istadu; sunt sos dolorosos lamentos, chi unu male auradu in, s'amore faghet a sos bagianedos de coro gentile, e informados a nobiles sentimentos pro chi dai su fattu meu imparent mezzus a si guardare dai sas primas impressiones de una faccia risida e giocunda, et a no esser troppu faziles a creere a sas promissas e allusingas de su sessu Galante, su quale volubile pro natura est cun tanta arte fine ammaestrada in s'iscola de ogni finzione de dare puntas a su malignu serpente seduttore, e mentres mustrant giugher rosas in buca, hant in coro ispinas velenosas, cun sas quales cando manucu si crede punghet s'anima a morte senza.isparanzia de risuscitare. Edducas, giovaneddos, chi sezis in amore leade dai mè esperimentu, leade dai mè ischeddascione a non bos fidare troppu fazilmente de custas attrativas de bellesas passizzeras e grasciosidades de una faccia risida avvenente ch'a prima vista bos impressionat e paret chi bos furet su coro proite essende e paret chi bos furet su coro proite essendo sa femina mobile (cale puma e su entu) cando già fortunados bos creides amendela pro sinzera e pro costante pro cosas de niente bos traighet, bos abbandonat in brazzos e sa vera illusione, e tando che deo male affortunadu, troppu fazile a crere in sas promissas, cun disingannu amaru e inutile tardu pentimentu costrintos tezis essere esclamare: Ah! est puru veru ch'in femina non b'hat de fidare, e pro chi cun sa manu ostra tochedas custa vera zidadùe de cantu deo isto pro bos descrier cun custos ruzos e male cumpostos versos leggide attentamente e poi …a boia su giudisciu. Ecco in breves sas reiones prinzipales de cust'opera.
Tepp'haer consighidu s'iscopu chi mi haias prefisu? Non toccat a mie a lu giudicare. In d'ogni modu dichiaro francamente chi movidu dai su disizu ardente d'esser utile in carchi manera a giovanos, amigos e cumpagnos, cunsizendolos a esser prudentes in cudda elessione de sa cumpagna a su quale su coro los inclinat, e poi dai sa corrispondenzia de sos affettos sa quale dipendet felizidade
o infelizidade in soro pro su cursu e sa vida, happ'azardadu intraprender cust'opera difizile dae pius valentes Autores e cum pius iscenzia abelidade poetica trattadu, e pro chi s'esitu non corrispondat a sos debiles ifforzos mios happo firma s'isperanzia in sos corteses lectores, chi mentre s'had a riconnoscher s'insuffizienzia mia, assumancu m'hana a esser prodigos de fraternu cumpatimentu, e s'hana a compiagher azzettare sa bona voluntade mia, non solu, ma chi una pinna pius abile, e pius adottrinada dei cudda de unu campagnola e pro peus, pro pagu analfabete, tet perfessionare cantu deo in sa ruzesa mia happ'abbrazadu.
Niente ne de mancu m'app'apoder giudicare fortunadu. cando cust'umile operetta mia tet poder fagher unu pagu de bene ai cuddos pagos esperimentados giovaneddos chi si ten dignare de la legger. In tanto augurende a d'ognunu de issos cale primmu fruttu e sa lettura sua chi no la fettan s'acciapada mia, esortendelos e non dissipare sos virgines affettos e sa prima chi si presentat a sa
mirada insoro, essende iscrittu chi:

Pro la leare bella e incostante
Mezus una feona e vera amante
A su mancu gosades allegria
Tottu su tempu de sa pizinnia.

Serra Barlolomeo

ARGUMENTU

1.
Mentras ch'unu manzanu
De una die de festa
Andesi a cheja impaghe e amore.
Innozente e bajana
Senz'ateru in sa testa
Che amare e servire su Segnore
De ider bene su preigadore;
Ca pro l'intender solu
No m'est che cando lu ido consolu.

2.
Appenas tramunadu
Mi che so ainie,
Ecco chenit su parracu a s'altare,
Mi so imbenujadu
A s'unu de ogni die
Cun veru coro a Deus po pregare,
E gai sò istadu
Finzas a cand'est pigadu
Giarme Logu a sa trona a preigare;
Segundu s'usu meu
Tando mind'alzo e minde peso reu.

3.
Prinzipia Delogu
S'ammuina s'appagat
Pro iscultare de issu sa sustanzia,
Chi li fit unu giogu
A fagher de Gonzaga
S'elogiu, e a narrer sa costanzia,
Cun su surrisu in laras,
E paraulas giaras,
De lu poder cumprender s'ignoranzia;
E cu impressiones
Chi commovian sas duras persones.

4.
Preigadore onu
Naraiat sa zente
Biada cudda mama chi ses fizu,
Deo a tale arregionu
Mi osto attentamente
Pro ider custos chi mi dan fastizu,
Mi giro de improvvisu
E osserv'unu visu
Chi non s'indat in mundu un'assimizu
E appenas giradu
Mind'hat sentidos e coro furadu.

5.
Issa s'est abizada
De sa confusione
Chi happo tent'in su coro in l'ammirare
Mirepiti sojada
Cun vera passione
Chi non mi desit coro e mi girare,
E pro s'ora es istadu.
Delogu abbandonadu
Senza li dare attentu a l'iscultare
Sinò mirende a Flora
Chi mi fit nezessaria pro s'ora,

6.
Fia fora e sè
D'ogni forza mancada
Chi no ischìa in su mundu chi fia,
Cando idia pro mè
Fagher una fissada
In sos ojos amore li leggia,
Gai torrat sa missa
Deo osservende a issa
E issa sempre fissa a faccia mia,
Li faghia su risu
Prontu lu torriat e prezisu.

7.
Paria in purgatoriu
Su goro inflamadu
S'amore mi cheriat affogare
Ass'ora e s'offertoriu
D'ognunu imbenujadu
E deo reu a palas a s'altare,
Tottu mi toccaian
Sos chi s'abbizaian
Chi fia reu pro m'imbenujare
E deo marmuradu
Comente un'istatua paradu.

8.
Finit sa funzione,
Su parracu si girat
E d'ognunu l'osservat dignamente,
Dà sa beneiscione
Da poi si retirat
A sicristia, e sind'anda sa zente
Ma pro me non fit festa
Si no a bucca abesta
Solu osservende s'idulu presente
Si non si movet Flora
Pro me in cheja fia istad'ancora.

9.
Sind'andat sa ghi adoro,
Su samben tottu in gherra
Si ponet ca isparit prontamente,
E mi restat su coro
Comente i sa terra
Cando tramontat su sole imponente;
Per unu oggettu tale
Fit a su naturale
Si no tottu diversu e differente,
Ogni cosa ch'idia
Bi fit de Flora sa visonomia.

10.
Tristu e sentimentosu
E cun dispiaghere
A passos longos a domo m'avvio
Pensende, sù isposu,
Però pro mind'iscere
Leo sa pinna una littera iscrio,
Primu ponzo sa data .
In breve istesit fatta
La serro in d'una bruscia e che l'imbio,
Benit sa mandataria
E la domando: ebe? — fit solitaria.

LITTERA MUNDANA A FLORA
Composizione Anacreontica
de AINZU SERRA

1.
(Cun su coro palpitante.
Tremante
Sa manu mia l'iscriet
Pro sa mia opinione
Est rejone
Rosa c'ha tie l'imbie.

2.
Su coro pro t'adorare
Chelzo dare
A tie sole risplendente
De rimas un'imbisita
Iscritta
La tes legger seguente.

3.
Venere rezzi su donu
Su pius bonu
Chi s'amante dada a tie,
Venere rezzi su coro
Ca t'adoro
D'ogni istante e d'ogni die.

4.
De te Venere ermosa
Una rosa
Pius bella no happ'amare;
Mai a tie non lasso
Ne mi spasso
Senza te, non potto istare.

5.
Amami rosa dechida
Chi sa vida
So pro te deliriende
E t'adoro Clori mia
Finzas chi sia
De sa vida argonizzende.

6.
A cale siat costu,
Finzas a mostu
Bella Venere t'istimo,
Non cretas de t’olvidare,
Ch'a t'adorare
Custu coro ogn'ora intimo.

7.
T'ammiro candida nue
Però tue
Non m'affalzes in s'amore,
T’istismo candida luna
Ca ses una
Giara istella de lugore.

8.
Ses pro me fiore riccu
E ater'afficcu
No happo si non ses tue,
Senza te unu mamentu
Discuntentu
Reposare teppo inue?

9.
Non happ'in logu reposu
E affannosu,
Custu coro ti presento
E si'ncale c'una attesa
T'happo offesa
Clori bella m'arrepento.

10.
Arrepentidu iscrio
E disafio
Sa limba tantu maligna,
Ca mi narat d'ogni Musa
Pedi iscusa
A sa Venere benigna.

11.
Ecco ubbido immantinente
E presente
A tie Venere m'inchino,
Cun tristu e seriu tonu
Perdonu
Dimandende a tie fino.

12.
Perdonami Clori dechida
Chi sa vida
Prote happ'a imprendare,
Perdonami Clori amabile
E variabile
Non tepp'esser in s'amore.

13.
Non mi abbandones columba
Chi sa tumba
Si m'abberìt si non t'amo,
Ca ses s'unicu oggettu
Chi cun affettu
Ad ogn'ora intimo e bramo.

14.
Clori si m'istimas crè
Fiorit pro mè
D'ogni gustu, ogn'allegria,
Sa chitarra a filos d'oro
Pro te coro
A s'istante leare tia.

15.
A cantare innos de gloria
In memoria
Tua, Venere amadora,
Ma cun boghe armoniosa
Nara, rosa
Si m'istimas como est s'ora.

16.
Ti giuro de veru mante,
Chi costante
Finzas a mortu tepp'istare,
E tue sinzera e pura,
Giura,
Chi mai m'has affalzare.

17.
Chi non s'affalzes cunfida
Ne vingida
Ti mi mustres disprudente
Chi eo columba amada
Cunservada
T'happo in coro e in sa mente.

18.
Che turturella amorosa
Ch'est dicciosa
De s'amante intro e su sinu
Eue ses vivente in me,
Deo in te
M'allegro caru germinu.

19.
Su coro meu ti bramat
E t'amat
Ad ogn'ora ogni mamentu.
Però pro cantu t’istimo
Meda timo
Non mi lessas cun turmentu

20.
Sa forte e dura cadena
Mi allena,
Dea de divina prole,
Ca non lasso de t'amare
Cantu senz'ispuntare
Su manzanu istat su sole.

21.
Ecco su coro ti dò
E firmu so
Istimended a d'ogn'ora
Ti rendo su pius dignu
Veru carignu,
Clori viva, amada Flora.

22.
E cun suave dolzura
S'ermosura
Tua sempre happ'a cantare
De affettu trasportadu
Regiradu
Isto finzas a ti lograre.

23.
Vivo pro te in diliriu,
E d'ogni martiriu
Tia azzettare ogni pena,
S'in manu anzena t'idia
Eo moria
Pro ti salvare Ermosa Elena.

24.
Pro finis mediu faghe
Chi cun paghe
Mi ames tue sende iu,
E a tie si m'istimas
Do sas rimas
Chi sunt custas e adiu).

ARGUMENTU

11.
Benit su mesu die
A nos sezzere a pranzu
Ma, non podia unu mossu ingullire.
Fin pugnales a mie
B'aimis un'istranzu
E non podia mancare de comparire,
Mi sezz'in cudd'istante
Coment'un' amante,
Cun oriolos podides ischire,
Mi lesi una fuscheta
Ma non tocchesi ne pasta, ne petta.

12.
Poi appenas pranzadu
Mi che sesso in sa posta
Cun sa mente pro issa regirada,
Su sero isperansciadu
Ispettende risposta
E finzamentas a tardu mi che dada,
A ora e sas sette
Mandat unu bigliette
Ch'ispettait una serenada,
De ho haer mancadu
Chi fit fidele e chi essere andadu.

13.
Appenas ch'appo idu
Sa voglina rezida
Leggio: chi fit fidele it'allegria!
Esponzo unu cumbidu
Pro esser obbedida,
Bess'a mi fagher una cumpagnia,
Cun promissas, e donos,
Fatt'a sos pius bonos
E sinzeros cumpagnos chi tenia
De mi poder fidare

14.
Zente chi non mi'ingannet
Ch'appat fide e umore
Chi no mi potat custu iscobiare,
B'est compare Giuanne,
Compare Salvatore
E compare Franziscu pro sonare
Lis racconto su fattu
Si mustran prontos pro m'accumpagnare
Ogn'unu de issos gratu
E non fit nadu a pena
Chi promittin bessire a poi chena.

15.
Restamus de assuntu
D'ognun'unu volentieri
Narat: niunu non fettan a mancu;
Ando a domo a mamentu
Leo pinna e tinteri,
E unu foglio de pabilu biancu,
E mi ponz'assentare
Cosa noa a cantare
E benin isso chi già fia istancu,
Pro sa presse de andare
La lasso gai senza l'agabbare.

16.
Passo una tazza di inu
E faghimos s'andàda,
Fatt'a mie bi fit su sonadore.
Send'in mesu caminu
Flora fit accherada
Dai tesu s'idiat su lugore,
E cun passu distesu,
Cun su zigarru azzesu,
Eccomi prestu a dananti e s'amore.
Faghimus sa firmada
E cominzu si dat sa serenada.

Fit una notte de friscu
E senz'umidu in terra
Chi nd'aiat su gustu a girare
E compare Franziscu
Sonende sa chiterra
A narre chi cheria faeddare,
Mi la leat in do,
Primm'e tottu eo prò
E cominzio sas rimas a cantare
Leo sa primma oghe
Chi seguente si legget inoghe.

SERENADA

Ed!! Si podia che bentu
Lezzeri.in altu olare,
Già ti tia imbisitare
Columba intro s'apposentu.

2.
Ed!! Si olare podia
Lezzeri in forma e zefiru,
Tia fagher unu girU
Pro t'ider columba mia
Send'ambos in cumpagnia
Tian sas penas calmare.
Ed!!.... Lez.....

3.
Sa pena chi so suffrende
Mi tiat zessare lestra,
Si podia in sa finestra
Che zefiru intrare olende,
Lezzeri pro non m'intender
Sos chi ti solen tentare.
Ed!!..... Lez.....

4.
Sos chi pussedin cust'ave
Ch'est in su felize gosu,
Sende in sonnu amorosu
Che zefiretto suave
Ed!! Si podia a ch'intrare
Ed!! si podia che bentu
Lezzeru in altu olare.
Ed!!..... Lez.....

5.
Ed!! Si podia in persone
Intrareche in cuss'istanzia
In'u'est cudd'abbundanzia
De sa mia afflissione,
Tant'ambos in su balcone
Già non timis accherare.
Ed!!..... Lez.....

6.
Send'ambos in sa coluna
De s'Olimpo in ue isperia (s)
De Ninfas Dione e Geria
Tia narrer nd'happ'una
Tando eroe de sa fortuna
Mi tia poder giamare.
Ed!!..... Lez.....

7.
S'haia a tie in favore
Cantu mi soles attraer
Antare mi dia de haer
S'ispigiu de su lugore
Ca e celeste candore
Ti ses devida adornare.
Ed!!..... Lez.....

8.
Ti ses de candore azzesa
De favolosa pintura,
D'Egeria s'ermosura
De singolare bellesa
Dai Romanos intesa
Pro deidade adorare.
Ed!!..... Lez.....

9.
E cale Pintura umana
Guale a tie s'agatta?
Ninfas ch'Apollo t'hat fatta
De sa Driades galana,
Chi Venus, Clori e Diana,
Benin a tie a dorare.
Ed!!..... Lez.....

10.
Teti, Pandora e Giunone
S'inchinan a su pè tou,
O si torreran de nou
Sas Vestales in persone,
Pro ti fagher orassione
Si tian imbenujare.
Ed!!..... Lez.....

11.
De Iprocreme o Parnaso
Sos zertos fattos descrio,
Melpomene Erato e Clio
De te nde presentan casso
Chi prevididu est Pegaso
Benner pro ti che leare.
Ed!!..... Lez.....

12.
Provennidu est in lestresa
Postu in usu e costumene
Pro formare unu volumene
De sa tua candidesa
Da Calliope est suspesa
De s'Eneide a cantare.
Ed!! si podia che bentu
In cuss'apposentu intrare.

ARGUMENTU

18.
Appenas chi finida
Istesit sa cantada
Fimis dispostos de nos retirare,
Dada sa dispidida
Fat'è ojos s'alzada
E de zinnu mi faghet a intrare,
Adempi a su dovere
Domando de piaghere
A issos un'istante a iscugiare,
E fatto s'accostada
A sa gianna chi fit mesu incasciada.

19.
Intro cun pompa e gala
Perunu, cristianu
Fit in cuss'ora che deo contentu,
Alzo lestru in s'iscala
In su primmu pianu
E it inie m'arresto
E dimando: permesso,
Escit Flora e m'abberit a mamentu
Mi fissat totos duos
Sos ojos e che ruo in brazzos suos.

20.
Cun amore e affettu
Lestramente m'abbrazat
Ei sclamat cun pena miserina!
Mi coscat in su lettu
Mi attit una tazza
De abba ma non fit no meighina
Mi torrana sos brios
Alzo so ojos mios
Mi l'aso e mi l'abbrazzo cara nina
Mi calmat su dolore
E fit su primmu asu de s'amore.

21.
Min d'alzo in cudd'istante
Cal'Anghela Divina
Si li idian'in ojos sas lagrimas
Si ses fìdele amante
Mi nesit : ti so Nina
Domandami a sos mannos si m'istimas,
Carignos e affettos
E atteros segretos
Chi non lu poden narrer custas rimas
Ins'ora b'hat passadu,
Chi m'hat de ogni cosa ismentigadu.

22.
Mi ponzo a mi ch'andare
M'ammento e sas persones
De sas chi fora b'haia lassadu,
E mi faghet frimmare
Po li narrer cantones
Cha chi fia poete l'hana nadu,
E li nesi mi ch'ando
E già tin de las mando
Ch'in d'appo unu volume copiadu
Anzis ti naro e crè
Chin d'appo a fagher atteras pro te.

23.
Tocco sa manu a Flora
De sa promissa fatta
Mi narat a la giugher e non faste,
Presta mi c'ando a fora
E osservo in piatta
Chisco cuddos in logu ne in paste,
Si sun arrabiados
E si che sunt andados
Nende chi fattu l'haia cun aste,
Mi pone custu fogu
E che naran su fattu in d'ogni logu.

24.
Bessit custu rù rù
A dolu mannu meu
E cominzat sa idda a murmurare,
Tottu istana ciù ciù,
Gesù ite coju feu
Mirade a chie solene leare
Unu mes'accudidu,
De unore abburridu,
Pisedda chi solet mandigare,
A bi ponner sa manu
Este a fagher leare su fulanu.

25.
Apenas ch'ana ischidu
Chi custu già fit beru
Luego mi cherian mandigare
Forman unu partidu
Arrogante e fieru
Chi mi devian sa vida leare,
De Flora sos parentes
Fin sos pius potentes
Custos sos primmos fin a m'assaltare
Deo sempre chiettu
Comente un'anzone mansuetu.

26.
Sos colpos sempre in palas
Mi faghia falende
No ischia su modu e la filare,
Ei sas limbas malas
Sempre andende e torrende
Mai non si soliana arressare;
Già in tempus de gherra
Faulas fin'a terra
A chie nde podiat inventare,
Nende: Ite cogiu feu
Pro issu no fit mezzus fizu meu.

27.
Totu raza malignos
Cun sa perfidia andende
Cun d'un'anima dura incrudelida,
E deo cun impignos
E continu appretende,
Tantu tra mè ischia; Flora est fida.
Tantu fia dispostu
O balanzare o mostu,
O no happende a issa mancu vida
Tottu cumbattan puru
In manu mia est su ratu seguru.

28.
Intanto sa perfia
Procursu a tres meses
Sempre creschende a mi fagher perire.
Fimis in Sant'Andria
De s'annu ottanta sese
D'ognunu in Tissi lu podet ischire.
In dogni cantonada
Sa zente ammanizzada
Risoluttos continu a mi occhire
E i s'Onnipotenzia
M’hat salvadu cunforma a s'innozenzia.

29.
Issos cun tanta boria
Istrepidu e rigore
E ite nd'han bogadu e su ciarrare,
Dei appesi vittoria
De Flora possessore
Padronu e mere a mind'aprofettare,
Si truncat su tropogiu
E faghimus su cojo
S'ultimu sapadu a carrasegare,
Si faghet una festa
Chi seguente no la manifesta.

30.
Fit cuntentesa a mie
Cando bi considero,
Ambos cun Flora, ite divertimentu,
Però s'attera die,
Sa dominiga sero
Anzis pius restadu sò cuntentu.
Cussos già vin consolos
Chi fimis ambos solos
Tottu su sero intre un'apposentu,
Ambos sempre abbrazzados
Ai! ite gustos sa die leados.

31.
Primm'e iscurigare
Da issa mi dispido
E li torro un'abbrazzu a repitire,
Sende pro mind'andare
Mi frimmo, e la cumbido
Si enit sa notte a divertire,
Nesit: chi no fit sana,
Nd'haiat pagu gana
Chi fit istracca, lu podia ischire
E nesi: So seguru,
No b'andas tue, no b'ando eo puru.

32.
Assora mi retiro
M'avvio per mamentos
A passos longos e cuidadosu,
Ando a domo e suspiro
Cun milli pensamentos
Comente podet esser un'isposu,
E mi ponzo a chenare
Ma, ite mandigare!
Sempre pensende in su passadu gosu,
E appenas chenadu,
Ogn'unu in domo prestu s'est colcadu

33.
E deo resto solu
Senza m'inde pesare
Solende in tantas cosas reflittire,
E cund'unu oriolu
Ca fit carresegare
E istaia senza divertire,
E istare inserradu
Paria impressionadu,
Tando disponzo a mi ch'essire
Mi leo su capotto
E sonat su relozu e fin sas'otto.

34.
Nd'istudo sa candela
L'apicco in d'unu giau.
E mi che sezzo in sa gianna a s'iscuru,
Passat unu in carrela
Issu mi narat: ciau
E deo li rispondo : ciau puru,
- Comente ancora in domo?
Totu ballende como
Mi nesit, e s'accostat a su muru
Ell'e prite nno benis?
E la serras sa gianna e ti prevenis?

35.
- Ite gustu mi leo
In su divertimentu
Li nesit pro ghi zente b'at assai,
No b'est chie cherz'eo
Fatt'appo giuramentu
Si no best issa e b'andare mai
- Nesit: Ite ses nende
Da ghi Flora est ballende
No est pro issa chi ses nende gai,
Tando no l'happo ida
Ch'est cun d'un'atteru a mascara estida.

36.
- Sa giustiscia t'istruat
Cussos sentidos bonos,
Li nesi: E tand'aberu s'est giuradu.
- S'est faula mi ruat
Chentu chibanta tronos
Chi m'idas in cust'ora settensciadu,
Da ghi bi via como
E sò pigadu a domo
Chi mi ch'hai sa pipa lassadu,
Issara fia inie
Bid'app'a issa e bi creia a tie.

1.
- Mancaris chi ti giures non ti creo,
Non solu a tie, ma, si enzarat Deu,
Ca dabb'ida non est cun s'oju meu
Sa cosa mai la potto creer deo.

2.
- Ma mi paret possibile chi gai
A mie tenzas in malu conzettu?
Nara, si unu simile difettu
I custu modu proadu m'has mai,
De custas falzidades grav'assai
L'ischis tue su coro meu est nettu,
O cres chi ti lu fattu proo castigu
Cun chie m'amo a esser inimigu!

3.
- Ma nara caru: potto dubitare,
Cun chie mi dat d'ogni piaghere,
Chi ti confesso s'adabile essere
Su coro in manos mi ti diat dare.
Manco de vide su bei pensare,
Ca m'est troppu difìzile su crere,
Pensare chi da issa so traittu
Manco e dovere, ed es troppu delittu.

4.
- Ma non ti crettas chi sia arrivadu
Cun dun'iscopu de rivalidade,
Ei lu giuru comente unu frade
Chi custu in ojos mios est costadu,
Pro cust'est chi s'avvisu t'happo dadu
Ca in tie che tenìa libertade
E ti confesso sas cosas derettas
Peus pro te s'infalzu l'has azzettas.

5.
- No isco a chie soler obbedire,
Como sò in penseri su pius mannu,
M'est causa, m'est pena, m'est affannu,
M'est dolore e non poder resistere,
Su t'intender de non repitire,
De unu coro amadu tale ingannu,
Como in affanau e intriccios sò
Penso chi si, e mi paret chi nò.

6.
- Si discurres su fattu t'enit giustu
Si lu leas prezisu in custu essu;
Pensa cun cale afficcu o interessu
Cun cale iscoppu o siat cale gustu
Ti esser bennidu a ti narrer custu
Sende falzu and'accader un'azzessu,
Cun chie mai mi sò giuttu male
And'azzender un'odiu immortale.

7.
- No m'appagas cun cussu solu ebbia
Deo tenzo diversa opinione,
Chi sende in cudda mia passione
Ischis chi tantos rivales tenia,
E potto creer chi esa cumpagnia
Ancora nd'appat in s'intenzione;
E tue, unu terzu podes esser
Pagad'aposta pro bei resesser.

8.
- Ecco m'has oltraggiadu e m'has offesu
E deo in tantu ti do su perdonu,
In primmu chi non tenzo cussu donu
De cussos tales a ch'esser in mesu,
Ca pro soddos perunos has compresu
No and'a perder un amigu onu
Anzis si potto bi ponzo reparu
Cand'istimo im'amigu, e l'appo caru.

9.
- Non soles un amigu abbandonare
Pro paga, ma lu naras in cust'ora
Bon'est, s'amigu, su inari ancora,
Non lu fettas oggettu e furriare,
Comente chi si tin de solen dare,
Non lu creo, chi che l'imboles fora
E andan bene sos dissignos tuos
Nde perdes unu e amigu, en d'has duos.

10.
- Si sende falzu ti lu aere nadu
E forse chi b'haisti accunsentidu,
Però, ca t'appo in fide favoridu
M'agatto cun rimproveros pagadu,
De unu traitore insinuadu
De su mezus carattere ispucidu,
Est dicciu antigu, e de su mundu fadu
Chie narat su giustu est odiadu.

11.
No ti lu potto narrer in pienu,
Ma ne mancu ti lasso accreditadu,
Giudas puru, fit omine fidadu,
E traitu hat a Cristos Nazarenu,
Tue puru ses omine terrenu,
Ca non t'appo su coro mesuradu
Pro cust'ora disizu in custu so
Ne mi fido, ne crettida ti do.

12.
- Bido, ti dispiaghet, t'est affannu
Ca ti consizo mi giamas crudele,
Chie ti narat su giustu est tirannu
Ca cunfundes cun s’utile su dannu
Su profettu ti paret aspru vele
A chie narat s'iscassu l'attendes
Pro su bonu t'affannas e t'offendes.

13.
- Si m'affanno, m'offendo e m'inchieto
Ca mi sunt agras sas ispressiones,
Si chi enis su atteras rajones
Beninch'a domo mia chi t'azzetto,
Ma si torras cun custas ti prezetto
Chi nde suzedin mannas chistiones
Si faghes una simile attrivida
Mancu sa gianna ides a s'escida.

14.
- Cust’et bestialidade
- Non ti les su punt'in susu
- So ennidu in libertade.
- Ses bennidu pro abbusu.
- No m'amaisti che frade?
- Ma non t’istimo piusu
- Adiu, e tenidi contu.
- Salude, e bessiche prontu.

15.
Ma! Deus! a cal'ala m'happ'a dare
In custu istadu tristu de isventura
Beni custu m'avvertit e cun giura
Chi li meritat credita e li dare,
E m'est pena su soler dubitare
De cudda tantu amabile pintura,
S iscultu custu, mi paret seguru,
Si pens'in issa mamat troppu puru.

16.
Ma lende dai fundu ogni rejone
E bisonzat pensare a d'ogni cosa,
Dadila puru, fit un'amorosa
Femina ch'amaiat a Sansone
E a sas segus sa traissione
L'hat giuttu, e diventada est ingannosa,
Bastat ch'and'a chiscare su perfettu
E agatto s'ingannu in d'ogni zettu.

17.
Bastat, cherzo fissare s'intellettu,
Sa idea leada est infallibile,
Chirco e fatto ogni mediu possibile
Finzas a iscobiare su segrettu,
Salvu mi cherzo de custu suspettu
Su chi tantu mi paret increibile,
E osservo su modu in d'ogni casu
Finzas chi sia bene persuasu.

ARGUMENTU

37.
Appenas ch'appo intesu
Ch'a ber us'est giuradu
Mind'est' pigadu a bucca su velenu,
Mi so tentu de offesu,
Sol'in haer pensadu
Flora est ballende cun omine anzenu
Faularzu, impostore,
Li nesi; e traitore
Marranu chi ti essat un'alena,
Cun custas cosas vile
Pius non giumpes su meu giannile.

38.
Issa si ch'est andadu
Si t'hat a dispiagher
Li nesi: ma fit agra sa preposta
E dei so restadu
Senz'ischire ite fagher
Quasi cun sa mente mesu morta,
Isto pagos momentos
Cun milli pensamentos
M’avvio a osservare a bella posta
Intro in su camarone
E bid'a issa, e cun bona persone
Fin ambos a un'ala
Pro aer bidu a flora
Faeddende cun zestos tantu investa
Totta e posta e gala
Estida de segnora
Cun d’un’isciallu de seda in sa testa
Ma tottu immaginade
A sa fine pensade
Chi est custu chi Flora l’est a dresta?
Ischides chie siat?
Su pius veru chi mi pessighiat.

A SA TALE VISTA ESCLAMEI

1.
Ahi! ite ido! ite tento?!
Custa già si narat pena!!
Su samben in d'ogni vena
Gelidu currer mi sento.

2.
Ite pena dolorosa!
Ah! it'istadu crudele!
Cust'est su coro fidele?!
Chi pro issa sende ermosa
A die e notte regiro,
E in s'istante la miro,
Resa già in manu anzena,
Ahi! a ite ido ite tento?!
Custa già si narat pena!

3.
In cal'istadu m'agatto
Privu de forzas e brios?!
Miseros affettos mios!
Pro boia e cantu patto!
Ma ite penso?! ite fatto?!
E non m'imbolo airadu?!
Ma miseru e disarmadu
Innutile mi presento.
Su samben..... Gelidu curr.

4.
Si m'arrisco o. tale costu
Chi fatto tale attrivida
Mi prezipito sa vida
E assestante so mortu
E m'agatto in manos postu
De sos fieros abissos
E issa, intantu cun issos
Sas dies passat serena.
Ah!!..... Custa.....

5.
In cal'affannu o assustu
Ses miseru coro meu,
Consizu, consizu, o Deu
In cust'amaru disgustu,
Su pius prontu est su giustu
Est fuirela de vista
Sa tantu isventura trista
Chi si la miro ispavento.
Su samben..... Gelidu curr.

6.
Resta, isperigura e infida
In brazz'a sos odiados
In affettos duplicados
Su e tider ti ses bida,
Ca in d'una incrudelida
M'impremis tantos pugnales,
Causa de tantos males
De ingannia piena.
Ah!!..... Custa.....

7.
Coro prite non t'assentas
Chi non reposas in paghe,
Nessi como calma faghe
Ses lontanu e ispaventas,
L’isco, chi non t'alimentas
Si no has s'oggettu amadu
Ma, ides su capitadu
Ch'est in vista, e no mi pento.

8.
E placa, coro un'istante
Già so pro ti consolare,
E torro de nou a mirare
Su visu e s'infida amante
Si calchi iscusa appagante
Ted’hear pro si difender
Prestu olo pro intender
Da ucca sua s'iscena.

ARGUMENTU

40.
Appenas ch'appo idu
Sa tale funzione,
Fia pro m'imbolare a s'improvvisu,
Ma, poi reflittidu
In sa riflessione,
De su chi suzzediat in prezisu,
Prestu sas palas giro
A domo mi retiro
E che li mando a sa mama s'avvisu
Poi mi so corcadu
Ma, non drommo, su coro abbolottadu.

41.
Su coro in abbolottu
Angustiosu e tristu
Fit a Flora fettendeli su luttu,
E torro a fagher votu
Pro nd'aer su cunchistu
De Flora e tottu cantu su produttu,
Benit s'atera die
Tottu chischend'a mie
E finzamentas chi mi ch'ana giuttu,
Ando pro mirare
Su modu e si soler iscugiare.
Ch'intro mesu brighende,
Nende cun mala chiza
Custas m'has fattu non ti passat nono,
E fini pianghende
Umpare mama e fiza
E ca dolu nd'app'appidu m'abbono
No fit fainighedda
Però ca fit pisedda
Leo deo, su maccu, e la perdono,
Placco e non la disdigno
Mi l'abbrazzo, mi l'aso e la carigno.

IN FACCIA A FLORA

1.
Pianghes? falza e pentida
Ti mustras cun s'amadore?
Sa prima proa de s'amore
Est custa? Perfida, infida.

2.
S’est custa proa lu nara
S'alzada de su visu faghe,
Si podes, reposa in paghe
Cun sa mancanzia in cara,
Cun cal'iscopu diclara
In s'amore m'has traittu
Forsi in cantu has su merittu
Non ses'istada servida?
Pianghes? falsa, e pentida?

3.
Custas lagrimas a rios
Ajò finimi e pensa
Custa fit sa recumpensa
De sos periculos mios?
Ch'est proa si sunu ios
Pro te sos mios sentidos
Pro cantu si sunu idos
Cumbattende cun dolore.
Pianghes…

4.
Faghe nessi chi zessadu
Siat, su piantu fue;
Nara chi non fisti tue
Chi miso eo isbagliadu,
Ca no mi so accostadu
A dananti a ti mirare
Ch'appo timidu e zessare
Pro una falza sa vida.
Pianghes…

5.
Pianghes e non ti curas
De risponder a mamentu,
Lagrimas de pentimentu
Ettas ma non sunu puras
Narami de non si giuras
Chì non m'affalzes prepone
Nende tenza cumpassione
S'ismentighet cust'errore.
Pianghes…

6.
Pro me calmo su rigore
Ma tue sias fidele,
E s'iscancelle su fele
Ogni fasta, ogni dolore,
E che in primmu s'amore
Torret dai cust'istante,
E t'happ'a esser costante
Novellu consoladore.
Pianghes…

ARGUMENTU

43.
Da gh'in paghe m'hat bidu
Custu non bil'innoro
Umile si mustreit e sugetta,
Anzis m'hat prommitidu
Propriu e veru coro
De non torrare a fagher sa civetta,
Chi nde idia sa proa
Faghiat vita noa
Senza bisonzu e li faghes minetta,
E non rispondo nò
E pro s'ora sa credita li dò.

44.
Passat carrasegare
Sa caresima intrada
Fit tempus de pregare e de perdonu
Si solet cunfessare
Poi comunigada
Fatteinde ider ch'aiat coru onu
E deo happ'apalpadu
E tottu cumproadu
Chi su rezire a Deu fit in donu,
Ca sana non s'idiat
Si calchi iscrapiciada non faghiat.

45.
Fit a d'ognunu nottu
E non cosas iscassas
Mi naraiant tottu
Prite non ti la dassas
Mira chi caschi die nd'has disgustu,
Cun veles calchi osta,
E a su tira tosta,
Inue a at'etantu
M'hat fattu fagher pro risu piantu.

46.
Su mese it'acunostu
Chi enzo cumbidadu
A li fagher a unu, unu batizu,
Deo l'happo rispostu:
Pro me happ'azzettadu
Como dimando a Flora su consizu,
Li fatto sa lamenta
Flora nde fit cuntenta
Nde tenit medesimu disizu,
E cun grand'allegria
Chi accumpagnat sa voluntade mia.

47.
Restat sa cosa intesa
Niunu a s'isvostare
Chi non fin fattos e coglionamentu
Totta fatta s'ispesa,
Benit s'ora de andare
And'a nde dare a Flora avvertimentu,
Li naro a si prevenner,
No haiat it'enner
Mi nesit e rispondet a mamentu,
Si bos solet piagher
No haiat battigimos de fagher.

48.
Cumbeni chi mi occa
Una osta m'isbrighe
Pro viver goi est mezus moribundu,
Mi ch'etto in d'una rocca
Chi pius non m'antighe
Ne chi fentomu nd'appan in su mundu
Nende gai enit una
Pro sorte o pro fortuna
E li naro su fattu da e fundu,
Mi narat ch'andaiat
E cun promissas chi bi resessiat.

49.
Andat cun totta cura,
Cun sentimentos nottos,
E da cominzu a la mariolare,
Nende: b'hat cofettura,
Bi passan biscottos,
E d’est sa parte manna ‘e sa comare,
Nados custos faeddos
Bortende sos calveddos
Si ch'andat sola a domo ‘e su compare,
E dan s'avvisu a mie
Ch'esser andadu luego a inie.

50.
Mandan una femina
E m'acciapesi reu
E solimus cun issa umpare andare,
Fit una pantomina
Cument'est beru Deu
Chin d'haia ilgonza e bi'ntrare
E hid'a issa inie
E min nde ponzo a rier
Però fit risu tantu e non crebare,
Epuru si fatteit
Pro ghi tantos iscandalos si deit.

51.
Da ghi custu finesit,
Poi de tempus passadu
A sa mama affidare li fentomo,
Issa mi rispondesit:
Ah già ses impressadu
Non t'has ammanizzadu mancu domo,
No la ides ch'est cina,
E debile de ischina
Cosa già est de affidare como,
No b'ides s'iscuredda
Ch'ancora est troppu debile e pisedda.

52.
Bellas impressiones
Cuminzesi a pensare.
Paret esser chi siat un'abusu,
Finis sas chistiones
Pro fattu de affidare
Non sin nde torrat a narrer piusu,.
E de Flora s'istada
Non solu est mezorada
M'anzis continu aumentende s'usu
E faghet una proa
Chi eo l'acciapesi a man'e coa.

53.
Su gh'est suzzessu a mie
Fit de Santa Itoria
S'intotto, de maju e lu notare
Si comente sa die
Pro antiga memoria
Chi hat puddedras las solet bogare,
E m'alzat sa mania
A sa cavalleria
And'eo puru a Flora e la portare,
M'avvio caminende
Ca sa zente fit già totta essende.

54.
And'è fatto s'intrada
In s'istanzia sua,
E bid'a unu cun sa briglia in manu,
Issa fit inseddada
Fatt'in coa e in giua,
E fattendeli fit su passamanu,
Appenas l'happo idu
M'imbolo inferocidu
E si scappat a fuer su tiranu.
E li naro: fit custa sa promissa?

55.
Li naro: anima vile,
Cust est sa recumpensa
De cant'happo cumbattidu pro te?
Coro duru ingannile
Rifletti como e pensa.
E non rispondet, fit fora e sè,
Unu ciaffu li medo,
Ma, lassu e mi cungedo,
E li naro: pius penses in mè,
Comente cominzada
S'est in festa matessi est agabada.

56.
Appenas chi hana idu
Chi che via appaltadu
Cominzana a pesare un'abolottu,
Sa idda nd'han frunidu
De su ghi fit costadu
E publican su fattu issas e tottu,
Tando serro e dente
Su l'ischire sa zente
Cuss'est chie su coro mi l'hat cottu,
Una voglina iscrio.
In segnale de cungedo e che l'imbio.

CUNGEDO

1.
Bois cun tanta chimera
Su fogu hazis allumadu,
E deo mudu e cagliadu
So che chi mai esistera.

2.
Bois cun tantas matanas
Bos sezis inchiettadas
Ma bos sezis isbagliadas
Dende retta a cosas vanas
Pro sas limbas rufianas
Sezis in cussa manera,
Sa chistione fiera
L'hazis boi produida
E gai l'azis sighida
Bois cun tanta chimera.

3.
Sighidu hazis s'argumentu
Crettende de bi alanzare,
E benid'est a resultare
Su alanzu a mancamentu
Ecco su ghi nd'azis tentu
Dai no haer placadu,
Hazis su bandu etadu
Cretend'e bos lastimare
E invece de l'istudare
Su fogu azis allumadu.

4.
Su fogu. azzesu est continu
Ca l'azis postu in andare,
Ca invece e l'istudare
B'azis postu su luminu,
E deo sende avvicinu
Chiettu mi so istadu
Ch'appo discustu e pensadu
E cumpresu ogni rejone
Bois cun sa chistione
E deo mudu e cagliadu.

5.
Bastat pius non mi ligo
Mi ghelzo isostu, iscapadu,
Sos contos m'appo tiradu
Zedo, e pius non prosigo
Anzi meda bos obbligo,
Si pro casu suzzederat
De m'incontrare e passera
Presto sos ojos vingide,
Tantu pro bois creide
So che chi mai esistera.

ARGUMENTU

57.
Ebè cun tantu vele,
E cun tantu passare
Ma non mi l'happo mai immentigada,
Ahi! si fit fidele
Cominzesi a pensare
Ite dolu chi ses Flora istimada,
Su coro mind'iscancat
D'ognunu in mundu mancat,
Avanti, custa puru perdonada,
Chelzo continuare
A Flora a bellu nou pro l'amare.

58.
Paria in d'unu vogu
Malaighende s'ora
Chi m'est bennida cuss'opinione,
Mi fit pena ogni giogu.,
A viver senza Flora
Mi fit sa libertade una presone,
Tanto pensesi: fatto
Appenas chi l’agatto
Torr'e amore, diclarassione,
E mi torr'a unire,
Cun Flora, risolutu e patire,

59.
Cun chie non fentomo,
Ma cun tantos passende
Incontro a Flora in carrera a su puttu
E s’avviat a domo
Cun gridos pianghende
Acudide ch'a ciafu m'has iscuttu,
A s'intendes sos gridos
Bescini inferocidos
Sos parentes : - chi est su vile bruttu
Ch'at apidu s'azardu
Dobbare a Flora senza riguardu.

60.
- Chi est? Cuss'animale
Lu podides ischire
Nd’essit issa cun faeddu a ittu:
- E cando mai male
T'hat solidu ferire
Forsi tet'esser caschi zinchiglittu,
- Atere ciaffigheddu
Mi dolet su calveddu
Su cavanu m'hat fattu biaittu,
Si custa che li passat
Finzas a m'azantarare non mi lassat.

61.
Tando prestu reclaman
Aposta am'attacare
Unu prozessu nieddu e fieru,
Sos testimonzos giaman
Pro los isgiaminare
Pro nde tirare su fattu sinzeru,
Benin isgiaminados
Quasi minetados
Chi cherian a narrer chi fit beru,
Ma poi arressu l'han
Ca non nd'han fattu nè casa nè lana.

62.
Non d’han bogadu azola
De mancu una peraula
Chi fit una calunnia ses bida,
Pius de issa sola
Chi hat cumpostu sa faula
Pro ca cummegus fit indispettida,
Una parente de Flora
Fattesid de pretora
Chi in bidda la contamus istruida
Ed est beru hat cussenzia
E giudicat de zertu cun climenzia.

63.
Deo pro narrer meu
Custu non bi lu innoro
Est femina e carattere e sentitu,
Issa è totta e Deu,
Pastit de bonu coro
Custu dai pizzinna l'hat apidu,
Est femina onorevole
Anzis caritatevole
Potto narrer pius de su maridu,
E regione teniat
Po ca Flora s'isempiu giunghiat.

64.
S'isempiu fit giustu
E li fit notu assai
Ma non haian cumpresu s'iventu
Da ghi happo intesu custu,
A esser Flora gai
Tando fattesi malu pensamentu,
O este caschi attapada
Ispinta o inzumbada
Chi l'hapan dadu intro de calchi
[aposentu,
Sende dura a costare
Ateru non podia immaginare.

65.
Continu immaginende,
Massimu a s'ala destra
Cussu calc'unu fit chi fit in presse,
A pensare sezende
Accostiat lestra
Si no est chi proadu han'a s'imbesse,
Forsi sezende a manca
L'hapan dadu cun s'anca
Chi cussa sa segura teved'esser,
E tando immantinente
Lis imbiesi custa seguente.

1.
Pro sas faulas femina
T'has perdidu su merittu,
Su cavanu biaittu
Ti l'hana fattu in coghina.

2.
Si lu cheres atrogare
Ti l'hat fattu attera zente,
E no ischisti comente
Su modu e t'iscuiare
Cherfidu m'has indicare
M'has fattu mala faina,
Su ch'est in custa deghina
Cumprendilu canto ch'eda
Chi ses mini presiada
Pro sas faulas femina.

3.
A Miui pressiu tenta
Ses pro sas falzas peraulas,
A su mancu setas faulas,
Ca no setas bestimenta,
Si ti fatto cust'afrenta,
So offesu e nd'appo drittu
Ca senza fagher delittu
M'has puntu forte che arza
E da esser faularza
T'as perdidu su merittu.

4.
Ca ses falza non ti pentis,
O ch'as reione ti crese?
Has a faccia e su chi sese
E birgonza non nde sentis,
Anzis isco ch'aconsentis
Chi mi cheres isconfittu
Ca già fisti sempre a pittu
Cundiremi unu piattu,
E nadu has chi t'appo fattu
Su cavanu biaittu.

5.
Già ghi calcuna nde naras
Narada remediada,
Custa, ti l'ana esclamada
Ca fit dannosa e amara,
Affittadu t'has sa cara
Bai eser cucurina,
Cun roba corridorina
Non mi so medidu mai
E si t’hana fattu gai
Ti l'ana fattu in coghina.

ARGUMENTU

66.
Apenas ch'hana intesu
Su vattu, ite abolottu
Da ghi l'ana solida repasare,
Luego hana cumpresu
Flora pius de tottu
S'avviat s'iscuminiga a betare,
Nè deus e ne santos
L'aeren fatta a cantos
Ma issa mi cheriat prozzessare,
Tando set chi sa promissa
Fattesi, non pius amore a issa

67.
Sa promissa fit fatta
Pro chi dae su die
Cominzesi de odiu a giurare,
Cantos males s'agatat
Tott'enzan subra a mie
Si mi enit bidea de l'amore,
E non pius amore,
Solu odiu e rancore
Cominzesi in sas rimas a cantare
E pro primu signale
Publichesi unu bandu universale.

SU BANDU UNIVERSALE

Flora a sa vendita
(prima cantada)

Chie tenet dinari de avanzu
De los impiegare acolla s'ora,
Chi c'ada una puddedra curridora
Bene domata e la endene como
Puddedra e bona razza, e bona domo
Meritat d'esser digna de rispettu
Est puddedra domanda, e n'dan profettu
Cuddos chi tenen su inari arressu,
Nde ogan su totale e interessu
Deo l'haia e so pro testimonzu
Si la dana, la dana pro bisonzu
No set pro biscios nè pro maladia
Poi est a bider cudda masedia
Sa chi cuntenin sa achetta castanza
Issa est alta, istrizile ma lanza
Bene fatta, ma restat anchi tosta,
Però pro currer pare fatta apposta
Chi non nde ogan in custa incontrada
A cando como chi prima iscapada
Pro duas festas hat bogadu fama,
Ma matessi iscapada e sa mama
Anzis como in pius hat unu pannu
Da ghi cominzas sas festas occannu
Chie la leat s'hada a fagher bonu,
Duos annos istadu so padronu
Finzamenta chi l'appo ammaestrada
Como lu potto narrer ch'est domada
Ca isco bene sa professione
L'happo posta a sa briglia e a s'isprone,
A chingia chibera e a pettorale
L'happo avezza a latranza e a murrale,
E l'appo in d'ogni modu amasetada.
Ei como si naro ch'est domada
Si mi lu do su antu, happo regione,
Già b'andaia cun attenzione
Ca fit puddedra, e fit debile ancora,
Ca già s'ischit, sa robba curridora
Sempre cheret trattada cun amore;
Solu una osta l'usei rigore
Ca una mala faina m'hat fattu,
Tanto est ch'appo segadu su cuntrattu
Pro no istare in penas e cumbatta,
De s'ottant'otto bon de dò sa datta
A nomen tentu de Santa Itoria,
Chi sempre l'happo a tenner in memoria
Dae sa die in viscios mi l'han posta,
And'a s'istalla e mi l'acciappo isosta
Sa giua isconza e totta suerada,
Mi li fatto a danantì s'aparada
Ne annigiare, nè goi, nè gai
Cosa chi non m'haiat fattu mai,
Ite ted aer sa puddedra mia
Robba ch'han giuttu ae sa cavalleria
Sos ch'ischian chi fit meda lezzera;
Tando fattei e sa primma manera
Acostendemi a issa cun amore,
In gana e li frobbire su suore
Ca fit birgonza, ca fit die de festa,
Issa cun mossos, a manca e a destra
Ostendesi a sos muros de s'istalla,
Sos casches frusciaiana che balla
Senza m'offender, nè mi fagher male,
Già chi haiat unu naturale
L'aggradaiat sa cosa licarda,
E li giutesi mele cun prunarda,
E cun custu sos casches hat calmadu,
Tando est, chi mi che so accolziadu
E l'happo in costas averiguada,
Giughiat frìsca ancora s'ispronada
Pro cuss'es chi mi so arrabiadu,
Pro chi tra me matessi happo pensadu
E happo ene su fattu connottu,
Sas mias sas fadigas sunu tottu
E issos de su pannu aprofettana,
Sos chi e sas puddedra tenen gana,
Bos fatt'ischire su ghi no ischides,
Si calchi osta a festa la giughides,
Chi siat bene pulida e adornada
Cun d'una bella sedda fiocada
Chi giutta bene fatta giua e coa.
Poi l'agradat sa latranga noa
Ch'est cussu su pius chi li piaghet
Da poi a issa dassadela fagher
Su corridore si lu chiscat issa,
E boi s'azis de andare a missa
Andade e intendidela cumprida,
Chi da poi sa missa ch'est finida
Torrat de bellu nou a su padronu
Custa puddedra tenet d'ogni donu
Cumprendet si li faghene de manu
Iss'intendet che unu cristianu
Cust est reale, e non b'at gautella,
Si li narades impompadi bella,
S'istirat, e si faghet più asta
Est fiza e sa mama, e tantu basta
Su matessi lezera e fusighitta,
Sa mama ch'est unu pagu mannitta
Ancora podet fagher una cursa,
Oi sa podda chi m'hat dadu cussa
Battagliendela a sera e a manzanu
Su primmu domadore fit mezzanu
Dai cuss'hat leadu gallubia,
Tottu cantu ch'est ruttu in poggia mia
Deo fia su babbu ‘e sos dolores
E puru cun passenzia e amores,
Bi so a la domare resessidu,
No mi nde nego, mi so divertitu,
Ma, velenos m'hat dadu caschi osta,
Deo so su chi in brios l'happo posta
E attere sind'est aprofettende
Ca totas duas fin postas a bender
Sa mama como l'hana comporada,
Tres bostas a sa vendita est b'istada
O pro capriccios o mancanzias suas,
E i sa fiza custa est sa e duas
Anzis sa primma l'hana dada a prou
Ma b'hat ancora una cosa e nou
A sos comporadores a contare
Si la giughides a ispassizzare
No chi essende dae s'istradone,
Pro su motivu bos sa reione
Ca iss'est alta fora de mesura,
E si passades in caschi chesura
Già bos faghides in testa guastu
Pasade in logu nettu, e in logu astu
No boch'intredas in sos buturinos
Ca b'ind'hat meda e custus caminos
Chi no est fatta sa pitiriaca
E si pasades de su ru afacca
Mi chi isempiu mannu bos faghides,
Sos chi custa idea la giughides
Custa non boll'immentigheras mai;
Gia chi su dicciu antigu narat gai
Chi est avvertidu est mesu campadu
No bos happo su falzu raccontadu
Anzi su fattu est cun delicadesa
E chie hat gana e fagher cust'ispesa,
Andet in poggia de su sottiscrittu
Chi bo che giughet propriu a su sittu
De s'istalla chi solet abitare
E bo la faghet bidere e toccare
E comparades a coro seguru,
E senza mancu pigare a su muru
Bene podides sezere a discanzu.

ODIU A FLORA

Pro canto iu duro
In su mundu, e fina chi sepoltu
Sò vide ti giuro
Tesesses pessighida fin a mostu
Daghi morta t'agatto
Più istragge de ia ti fatto.

1.
Reposu mancu in lettu
Tes'aer cant'in mundu istamus bios,
De dispresiu oggettu
As’a esser pro custos ogios mios
Pro ca notte a die
Sempre malu passare dò a tie.

2.
Un'ora de recreu
In vida non tes'haer dae mè,
Pro c'a s'impicciu meu
Est inventare disgustos pro tè,
No happ'ater'in mente
Si no daredi penas frequente.

3.
Sa mia opinione
Pensat solu a ti dare ogn'angustia,
In tribulassione
Vives cant'in su mundu duras bia.
Proca senza ferizza
Ti trapasso su coro cun sa frizza.

4.
Si frizza ammanizzata
Giutti'n manu pro tè ogni mamentu.
Pront'è avvelenada
Pro ti fagher proare ogni turmentu
Si camperas chent'annos
Vivend'eo istas sempre in sos affannos.

5.
Vives sempre affliggida,
Finzas ch’appas sas dies terminadas
Da gh'agabbas sa vida
Ti cres sas penas chi sian calmadas
Sas de ida rattiras
Pius forte ndagattas da chi ispiras.

6.
Cand'estinta ti para (s)
Chi zedis de su mundu sos amplesso (s)
E deposta in sa bara
Anzis prosigo s'odiu non zesso
Ma, comente rivale
Ti disturbo su sonnu sepolcrale.

7.
Cuddu sonnu amorosu
Chi'n cudda terra sacra istat fidele
Pro atter est reposu
Però pro tè istrazziu est crudele
Ca mancu su piue
Tenet reposu inue abbitas tue.

8.
Unu fattu notoriu
C'est su matess'egusto intende zitto
A settimu Gregoriu
In cust'orrenda istragge foste imìtto
Cand'Enricu hat turbadu
Su sonnu battor'annos sutterradu.

9.
Bides ch'est rigorosu
S'oltraggiu fattu a Enricu quastu
Pro ghi s'atternu gosu
L'hana turbadu e l'han fattu sagrastu
Su tou, est più seriu
Istrazziu novellu e vittuperiu.

10.
E cando immentigada
Dormis, in cudda terra chi pro tè
Sa rughe piantada,
A dispettu de Deus unu pè
Inie hat a intrare,
Cun velenu s'oltraggiu a operare.

11.
Cand'a notte chischende,
Cumparit invisibile una puppa
Sò eo chi lattrende
Benzo, comente lattrada una luppa
Isdignadu e attrozze
Cun d'un'ira acutissima e ferozze.

12.
Cando oscura est s’aera
Chi ogni stella coperta est de nue
Che ferocce Pantera
Mi presento in sa tumba ue ses tue
Cun velenu e appazziu
E tando dò prinzippiu a s'istrazziu.

13.
Cun custas ungias mias
Sa terra iscavo e nde fattu unu fossu,
O cun cales allegrias
Bramosu infundo pro incontrare ossu
Pro mi lu ruzzigare
S'odiu antigu a ndelu sazziare.

14.
Cand'etantu chimentu
Bramosu de ifundare fossu fatto
E chi lompa a s'intentu
Chi cudda turpe linna in fund'agatto
L’aberzo perra perra,
Chi s'ischeletru tou infame serra.

15.
Cuddu pudicu entre
Cun custas manos fora ndelu imbolo
Ass'ora in cussu mentre
S'odiu de vinditta lu consolo
Senza tenner paura
Isgioghende de ogni ossu s'annatura.

16.
Daghi s'ora funesta,
Passat, ch'istraccu sò e su tribagliu
Tind'ispiccu sa testa
De issa minde fattu unu bersagliu
Ma su restu in cuddas
Lu lasso chi lu rozzighet casch'ae.

17.
Daghi sa testa ippico
E mi che la rettiro, caminende
Innastu mi l'apicco
In campagna in dun'alvure pendente
Chi su colpu enzat giustu
Su tribagliu chi fatto est tottu custu.

18.
Est su tribagliu meu
Tando m'imparo e tirare a su olu
Non fatto atter'impreu
Che bersagliare contr'a issa solu
A ballas la cumbatto
Finzas ch'affischinidasa la fatto.

19.
Dagh'est fatta a bisera
Nd’accoglio ogni minore fischinida
E nde fatto istrallera
Finzas chi Deus mi brivat sa vida,
Da poi chi sò mostu
Benit cummegus s'odiu sepostu.

20.
Dagh'enit su mamentu
De ghi Deus de me s'ada a servire,
Lu dasso in testamentu
Affaccu tou de mi sepellire
Ca bada un'atter'ora
De t'aggravare penas pius ancora.

21.
Turmentos crudelissimos
B'at ancora pro te a malaitta
Ripensa a sos novissimos
Cuss'est un'atter'ora de venditta
Su die de su giudisciu
Ch’in cudda valle semus tottu ammisciu.

22.
Cando dae sos Chelos
Han'abessire cuddas sette trumbas
Cun cuddos sette anghelos
Perì sa terra isvegliende sas tumbas
Pro nos dare signale
Andare a su giudisciu universale.

23.
Segnoras, poverittas,
Damas, contes, maschesis, e reinas,
Dognunu resuscitat
E s'annanghen sos ossos e caminan
Ma tue istrazziada
Restas inatta totta e isconcada.

24.
E domandas a mie
Ch'affaccu tou app'a esser sepostu
Ch'ignottu sò a tie
Nara: Sa conca mia has bidu o mostu?
E pro penas ti naro
Domandas sos amados pius caro (s)

25.
Cuddos ch'istimaisti
Chi lis'has dadu gustos e recreu
Cand'in su mundu fisti
Chi los amasti pro dispettu meu
Chi tottu anima e coro
Podian bene narrer fit s'insoro.

26.
Chi so deo non crese
Ca non t'ammentas nò de casci osta
E naras: chie sese?
Chi tant'agra mi torras sa risposta?
Pro t'esser domandende
Su ghi mi mancat m'istas insultende.

27.
M'ammento de su passadu
E de t'offendere tenes su merittu
So su primmu istimadu
Cudd'innozzente in s'amore e traittu
Chi m'hat fattu ingullire
Mossos ch'ancora so a digilire

28.
De ogni galidade
Mi ch'as fattu tragare mossos mannos
Sa giovanile edade
Mi l'has fatta passare cun ingannos
Chi su mezus fiore
Passad'appo e sos annos cun rancore.

29.
Cun rancore e velenu
Mi l'has fatta passare s'agiania
Cantu frittu e serenu
Lesi, e cantas nottes de iddia
Sos mios fint turmentos
E attere nd'aiat sos cuntentos.

30.
Tando cun piedade
M'has annarrer cu debile coraggiu
Nessi pro caridade
Ti prego faghe calma e tant'oltraggiu
Sò eo s'inculpada
Chi sempre senza conca so istada.

31.
Cun faeddos redossos
Como t'accusas chi tenes sas culpas
Tando chisca sos ossos
Achie s’est gosadu e sas pulpas
Cantu chisca a mie
Chisca sos ch'as servidu caschi die.

32.
Sos chi tenisti in domo
Sos cales amaisti sempre fissos
Cussus chiscalos como
Chissa sa conca chi la tenzan issos
Chi po nde fagher gloria
Forsi si l'happan tenta pro memoria.

33.
Tando disisperada,
Sentimentosa e fora da e tinu
Ti faghes sa girada
De andare ti pones in caminu
Disisperada e mastratta
T'avvias a sa valle de Isofatta.

34.
Da gh'andas a inie
Chi t'iden affliggida e isconcada
Tott'osservende a tie
Riende s'hana a fagher sa girada
Finzas a Deus su risu
Nd'had a benner bidende d'improvvisu.

35.
Da ghi zessat pro tè
Sos ischerzos, su risu su beffare,
Chi su divinu re
Hat a dare cominzu a cundennare
Po ti fagher cumparrer
Issu custos faeddos hat a narrer.

36.
Chi siat cumparida
Faghide sa ghi ch'est in cuddu postu
Cudda chi nde a bida
Nd'hat happidu e conca e ne a mostu
Sa ghi no hat connottu
Manch'in bida su bene de iss'etottu.

37.
E da ghi a sa presenzia
De Deus has'aesser presentada
Inastu sa sentenzia
Ti legget, e isclamat ses dannada
Ca s'amore has traittu
Tocca a u’est Sattana Malaittu.

38.
Da ghi ses dispicciada
E chi t’ido perdende su coraggiu
Mi fatto s'accostada
Ness'a ti dare su bonu viaggiu
A ispintas ti giutto
Fattendedi signales via... a Plutto.

39.
E da ghi in sas cavernas
Ses chi lontana has d'ogni istragge mia
Chi sas penas eternas
Tes haer de continu in cumpagnia
Deo happ'a fagher mediu
De bi enner cun ira e cun attediu.

40.
Bastat s’in chelu essera
In su gosu pius pro non patire
Deo fatt'a manera
Dae su chelu de mindi essire
Pro t'ider'in su fogu
E penas a ti dare in cussu logu.

CRITICA PRO S'ODIU
cumposta dae Ainzu Serra

Pro cantu iu duras
Finzas chi sias estintu e sepoltu,
Cun istrepitu giuras
Pro sa ghi t'hat offesu a d'ogni costu
Chi mosta l'agattas
Pius de cand'est bia la mastratas.

1.
In legger su cantare
Chi fagher cun istrepitu e rigore,
Mi trattenzo a pensare
In sos versos rimados cun furore
Chi pro t'aer traitu
Cumpones cun d'un’odiu infinitu.

2.
Prite tantu odiosu
Oh! miseru poeta isventuradu;
Non cheres in reposu
Lassare cudda chi t'hat afalzadu
Iscagliende in pienu
Subra issa turmentos de velenu.

3.
Pro unu vile amore
Chi pro zertos disipat ogni entu,
Ti cheres Autore
De tantu grave istraziu e turmentu
Non ti bastat sa vida
Chi la cheres a mostu persighida.

4.
Non mai mente umana
Cumponzesit che tue versos tales,
Paret essere insana
Musa e sas cavernas infernales
Sa chi t'hat assistidu
Pro tesser'unu cantu inferocidu.

5.
Si che tue odiare
Tiat d'ognunu chi s'idet traittu,
Non si tiat campare
Creo pro fagher piangher su delittu
Cun acutu dolore
Torrende sa vinditta a s'offensore.

6.
Prite tantu dolente
Li disizas sa vida e affanada,
Non ti paret dezzente
Chi siat un'offesa perdonada?
O cheres miserinu!
Viver sempre airadu che Cainu.

7.
In sa tale protesta,
Naras: de cando in sa bara l'agatas
E no ischis s'est mosta
Che una pedra su corpu mastrattas
Ca non proat turmentu
E tot'est tua fadiga e chimentu.

8.
E prite pagu sensu
Pones cantende, non podes ischire
Chi non podet s'immensu
Istraziu una manu eseguire?
E poi non ti seras
Chi cun s'idea sa forza superas.

9.
Da ue has su coraggiu
De la poder a man'insutterrare,
De committer s'oltragiu
Non ti commovet su solu pensare?
Chi present'in sa losa
Ti pones che pantera furiosa.

10.
In s'ultimu momentu
Cando s'anima tua est pro partire
Faghes su testamentu
Affaccu sou de ti seppellire,
Tando da ue sese
T'has a mover a fagher cantu crese.

11.
Da gh'has ispeldisciadu
De sa testa ogni fine fìschinida,
Restas a sussegadu
Ma no est mancu s'offesa cumprida
Sa ver'est cudda die
Ch'in mes'a tottu giudicat a tie.

12.
Naras ch'in unione
A tottu tet cumparrer istestada
E pro d'ogni persone
Est oggettu de risu et est beffada
Ma s'est senza sa testa
Naro chi sola in sa turba non resta.

13.
Si gai sun dipintos
Sos pensamentos tuos lesiados;
Nara: cuddos estintos
Ch'istesini distruttos e brugiados
S'est a su tou narrer
Cusso non poden su die cumparre.

14.
Cando pro giudicare
Cumparit sa Potenzia Sovrana
No la tene beffare
Nè persone divina e nè umana
Prite anima e persone
Non poden esser a dis’unione.

15.
Finzas cuddos defuntos
Chi sunt'in sos desertos divorados
Cun sos ossos ilgiuntos
Isperidos isfattos e truncados
Su die sun presentes
Cun su corpu che cando fin viventes.

16.
E cando intr'e s'inferru
Est chi lontan'hat dogn'istragge tua
Cun su coro che ferru
T'has a ponner in furia e in fua
Sempre cun su freneggiu
Finzas inie a li faghes isfregiu.

17.
Si pro sorte pentida
Benzeret dae Deus perdonada
Da ghi zessat sa vida
Podet esser a Chelu destinada
E tue in disconsolu
Cun sos Reprobos pena rezzis solu.

18.
Pro te non b'hat reposu
Si non moves su coro a piedade
Sempre tristu orgogliosu
E pienu e mala volontade
Tes sas dies transire
Ma ti dies de su vele consumire.

19.
Su modu de odiare
Lassa, non sias tantu iscandelosu,
Ca s'omine mustrare
Cun d'ogn'unu si devet generosu
S'a mie pones mente
T'insigno a operare diferente.

20.
Ammenta c'unu die
Tes benner a s'Eternu presentadu,
E tes esser inie
Che bonu salvu e che mal'appenadu,
Si non rezzis s'obbligu
Chi s'hat de perdonare s'inimigu.

21.
Si ti naschet in coro
S'odiu tantu de ira funestu,
Non tiranu che moro
Ti mustres però amabile e onestu.
E pro esser bramadu
Faghe cantu t'happ'haer insignadu.

22.
Non feroce mirada
Li mustres si la ides in caminu
E s'a tie affacciada
La ideras pro sorte e pro destinu
Cun d'un allegru visu
Mirala cun amore e cun sorrisu.

23.
Non tenzas no disizu
De li dare turmentos e nè penas,
Unu solu consizu
Ti bastet po truncare sas cadenas
De un infame cantu
De ira, de istraziu e piantu.

24.
Lassa chi a sa mente
Dian in totu sas iras adiu,
Non cures in niente
E manda sos disizos in obliu
C'has de li fagher male
Disturbendeli su sonnu sepolcrale.

25.
Abbandona s'isdignu
E non ti pentas pro esser offesu,
E mustrali carignu
Cando pius de ira ses azzesu,
Ca su nobile donu
De sa vera vendita est su perdonu.

26.
Un istraziu orrendu
Tue mi zittas de odiu antigu,
Ed eo un istupendu
De unu chi perdonat s'inimigu
Pro ti dare impremidu
Chi sempre su perdonu est esistidu.

27.
A sa morte odiadu
Fit da Saulle Davide profeta,
Cando s'est retiradu
A sa caverna oscura e segreta
Inue remunidu
Fit Davide, Saulle s'est dormidu.

28.
Davide vindicare
Si podiat de s'odiu mortale,
E pro lu perdonare
Li lesit solu su mantu reale
Fattendeli cumprender
Chi lu podiat cherfendelu offender.

29.
Fit Davide feridu
Da' Saulle e pius l'odiat,
Su Re inferocidu
Chi distrutta sa vida li cheriat
Davide si difendet
Perdonat s'inimigu e non l'offendet.

30.
E Cristos non lassesit
Bonos semplos de paghe e amore?
A su babbu preghesit
A perdonare sos cruzifissores
Ch'in sa rughe l'han postu
E sempr'hat perdonadu fina mostu.

31.
Dogn'atrozze turmentu
Proesit in sa sua passione,
E non desit lamentu
Bidendisi ferida sa persone?
E tue cun chimera
De custa cheres fagher istrallera.

32.
Cussa manu porosa
Ritene chi s'istraziu est bramende,
E cando bisonzosa
L'has a bider, succurrela e difende
E invece de male
Li sias in su bene liberale.

33.
Già chi t'est capitadu
De amare una femina lezera,
Calpesta su passadu
Chi t'ingannesit in tale manera
Ma lassa s'inculpada
Che chi mai l'aeres praticada.

34.
Che chi mai a sa mente
Cand'amaisti t'esseret bennida,
O chi puru vivente
No l'haeres connota e mancu ida
Già ghi no l'has affettu
Non la mires cun ira e cun dispettu.

35.
Non cures su criteriu
Chi su mundu ti faghet isfrenadu
E pone in vittuperiu
A chie t'hat tant'odiu insignadu,
Ma proferi cuntentu
De ponner paghe po su tradimentu

36.
Si cust'ira crudele
Non lassas sempr'has in coro un'istillu
Ca su matessi fele
Faghet viver a tie intranquillu
E no has che turmentu
Pro cumpagnu rimorsu e ispaventu.

37.
Allontana sa nue
Chi ti solet sos ojos oscurare,
Prite s'odias tue
Non ti tet mancu Deus perdonare,
E si s'odiu has fissu
De s'Inferru prezepitas s'abissu.

38.
Si l'has s'ira calmada
Chi pariat pro tè insaziabile,
Nara: s'est perdonada
Cun boghe giara amorosa e affabile,
E tando cun onore
Podes bantare c'has binchidu amore.

39.
Bastat s'a su merittu
Lasso ch'isfrenes cuss'odiu antigu
E si mai has traittu
Cominz'e dali su primu castigu
Ma si puru has peccadu
Sias primm'e l'offender làpidadu.

RISPOSTA A SA CRITICA

1.
Ite bellu cantare
Su ghi has fattu cun paghe, e cun amore,
Pro mi fagher calmare
S'odiu de tant'ira e de rigore
Ti ringrassio caru
Pro ch'a sas penas has postu riparu.

2.
Eppuru non creia
In custas graves mia passiones,
Incontraredi in ghia
Daremi in bonu tantos paragones
Nende: Si, ponzo mente
A tie mi consizas differente.

3.
Isco ch'est cun iscoppu
Pro su motivu chi ti ses fundadu,
Mandende a fagher troppu
Poi in manos niente t'ha restadu
Sas tuas meighinas
Sun aversu, e mi sun pius ispinas.

4.
Sunt ispinas crudeles
Sas meighinas chi m'has ordinadu,
Cun dissignos fideles
T'intendo chi m'has bene consizadu
Candu sabiamente
Impremis custu versu seguente:

5.
Non feroce mirada
Li mustres si la ides in caminu
E s'a tie affacciada
La ideras pro sorte o pro destinu
Cun d'un allegru visu
Mirala, cun amore e cun sorrisu.

6.
Ite bellas prepostas
Ite bellos consizos de iscultare.
Ma chie atteras bostas
Nd'hat proadu nde podet faeddare,
Cando un'offesa esistit
A faccia a s'offensore si resistit.

7.
No l'ischis su rancore
Faghet su samben de venditta azender
E m'est pena e orrore
A ti la fagher bider e intender
Ca su nde faeddare
Mi solene sos pilos astriare.

8.
Comente tranquillu
Mi mustro si l'incontro in caschi via?
Chi anzis de s'istillu
Sa ferida pus mi restat bia
Pro ca duos rivales
S'accia appare sunt creschen sos
[males.

9.
Est pena irresistibile
Placcare a faccia sua su disdignu,
No est mi possibile
Presentaremi a issa cun carignu
Su samben non lu frenas
Ch'anzis gelidu curret in sas venas;

10.
E tue cun curaggiu
M'istas preghende custu fittianu,
Ca non sentis oltraggiu
Est chi faeddas pacificu e sanu
Ch'invece de l'offender
Cheres a la succurrer e difender.

11.
Faeddas dai fora
De l'esser in su bene liberale,
Ca no ischis ancora
Ite siat dolore ìt'est pugnale,
Però, daghi lu proas
Ti promitto chi faghes rimas noas.

12.
In tantu a ponner mediu
Bido sa mente chi l'has impignada,
Ma si chiscas remediu
In tantu a ponner mediu
Inutile l’attaccas
Nde perdes sas fadigas e t'istraccas.

13.
Cando unu coro est puntu
In custu modu, iscugia no lu sanas
Tin nde dò un assuntu.
Cun pagas rimas Metastasianas
Ch'imprimit su dolore
Cand'unu coro est traitu in s'amore.

14.
- Turmentu su pius afflittu
De ogni afflittu turmentu
Est su barbaru lamentu
Cando unu coro est traittu
Este pena superiora
Chi resister non si podet
Ah! non lu proes ne pode
Si non l'has proadu ancora.

- Osservalu comente
Ti la escriet custa espressione,
Giusta identicamente
Chi paret chi la proat sa persone
Ca podiat ischire
Ite fit pena, e ite fit suffrire.

15.
E tue ancora puppu
Cheres andare a presentare eroe,
E ses senza isviluppu
Chi potto narrer chi ses naschidu oe
Andas a criticare
Fattos chi mancu podes bideare.

16.
Non nd'has mancu ideadu
Non sol'e b’essere in amore offesa,
Non intimas pensadu.
Ma finzas a ora non nd'aisti intesu
Pro cussu ti rettira
E in atteros fattos mezus mira.

17.
Mira sos fattos giustos
Chi non nde pottas haer un'affrontu,
Non fettas che in custos
Versos sos cales unu contu
Pro mi dare impremidu
Chi sempre su perdonu est esistidu.

18.
Nadu m'has ch'odiadu
Fit da Saulle Davide profetta
Cando s'est rettiradu
A sa caverna oscura e segretta
E ue remunidu
Fit Davide Saulle s'est dormidu.

19.
Ell'eprit ischidadu
Non nde l'hat a Saulle in cussu postu?
Si tando perdonadu
L'haiat a Davide o forsi mostu
Nessi tando rejone
Tent'haisti i su tou paragone.

20.
E cantu attraessare
Fattesit sempre in chische s'inimigu,
Però mai incontrare
Potisit pro li dare su castigu
In selvas e muntagnas
Sempre girende peri sas campagnas.

21.
E uest su coro onu
De su cale ti cres chi m'alimentas?
E ue est su perdonu
Ch'in custu paragone mi presentas?
E uest ch'incontradu
L'hat a Davide e chi l'hat perdonadu?

22.
No l'hat appidu in logu
E ue si cheria vendicare?
Però su tou est giogu
Chi lu fagher apposta pro zessare
Tottu s’odiu meu
Chi non lu zessu cantu Deus est Deus.

23.
Non podet esser mai
Chi non offesa enzat perdonada,
Si tottu fini gai
Chi ogni cosa eniat avvitada
Non pius vida ona
Tia fagher si tottu mi perdona.

24.
De un'anima offesa
Seguramente est giusta sa venditta,
Cando enit difesa
Dai chie est oltraggiada e resa afflitta
Est gioia ch'onorat
Unu coru attristadu e lu ristorat.

25.
E tue cun prontesa
De paragones mi dàs una miza,
No l'ischis chi s'offesa,
Cun sa vinditta sunu mama e fiza,
E abbitan umpare
Chi mai non si poden separare.

26.
Umpare istan vivende
Chi mai non si poden dividere
Ti lu so avvertende
Ch'est una cosa chi deves ischire
Una fiza a sa mama
L'istta fattu continu giama giama.

27.
Tenelu riservadu
Ch'est tota cosa zerta e non c'hat faula
De te in cantu has nadu
In contu non de tenzo una peraula
Ca in sos versos varias
Sempre dittende sas cosas contrarias.

28.
Poi cando pauras
Mi pones a cantare zertos versos
Nende, ch'in sas oscuras
Cavernas, sos affannos sun diversos
Chi si un'ora b'isto
Mi nde disizo fora e non resisto.

29.
Beo a non bi resesser
Finzas birgonza est a lu repitire,
Comente tiat esser
Deo ch'avvezzu so tantu a patire?
Chi sas penas non cazzo
Anzis pus mi nd'enit pius nd'abbrazzo.

30.
Cun severa costanzia
L'has azzetta cun brama e cun amore,
Perdida ogn'isperanzia
Non connosco ispaventu e ne timore
Tantu chi so' avvezzu
Chi e tantu patire nde so' ezzu.

31.
Tue accunnostu manda
E deo affannos azzetto in pienu,
Ca sa sola bevanda
Ch'appo tentu e chi tenzo est su velenu
Est s'unicu alimentu
C'happo tentu in su mundu a
[nutrimentu.

32.
Happo sempre tragadu
In vida velenosos alimentos,
E chie causadu
Est c'hat a mie custos patimentos?
Est cudd'anima'ona
Chi tue gridas perdona perdona.

33.
Però niunu sentimentu
Non bi do a sa tua avvertiscione,
Ca non timo ispaventu
De cantu mi das tue in paragone
Ca pro su narrer tou
Tantu sas penas non mi 'enin de nou.
34.
Non timo su pensare
Ne mai mi reduo a su perdonu,
E tue repiccare
Nd'has agio cunsizendemi a su bonu,
E deo a su contrariu
B'ando grande bramosa e volontariu.

35.
Non si ponzat in mare
Chie timet su entu furiosu,
E deo pro penare
Sas penas ch’isco e lasso su reposu
Ca non timo sas penas
Cand'issa puru est che deo in cadenas.

36.
Cudda fiamma azzesa
Non mi movet su coro e cant'est dura.
Anzis m'est cuntentesa
Cando ido suffrende a issa puru
Gai chi bi so eo
Chisco sas penas e chi patti creo.

37.
Bastat ch'istrem’untire
Non teppo in sas cavernas oscurosas
Anzi bando a ischire
Si sunt gai sas penas turmentosas
Pro ca si sunu leves
Nde li fatto proare pius greves.