di

Francesco Sanna

Tzitzu

Si su corpus ligadu est a sa terra
amos s’anima ch’est cosmopolita
e mancari si adatet a ue abitat
esplorat de su mundu dogni perra.
A boltas cun su corpus est in gherra
e da cussu unu pagu nd’est cuntrita,
ma cando in coro ispirat sa poesia
tra anima e corpus torrat s’armonia.

Antiogu

Deo a sa terra mia soe ligadu
in corpus e anima, in coro e in mente.
De babbu e mamma e de ogni parente
est sa sustantzia chi mi at formadu.
Naschinde s'abaidada chi apo dadu
mi at ligadu a sa terra e a sa zente
de amore primitivu e profundu
cun su cale amo s'universu mundu!

Tzitzu

Est beru, sa Sustantzia ti at formadu
ca da Issa si format s’Esistenzia,
ma s’“ordine” l’est benniu da s’Essentzia
chi cun su “Fiat Lux” bi l’at dadu,
cuss’ordine est s’Ispiritu increadu
chi mantenet su mundu in permanentzia.
Cussu est su veru Amore “primitivu”
chi su mundu e a tie mantenet bivu.

Antiogu

No cheria deo gai in altu arrivare,
tropu atrividu, a su Primu Motore:
che umile criatura su valore
no apo cussu Misteriu e prenetare!
Sa "sustansia", nar'eo, prus a tenore
de su chi so, est cantu a mi fraigare
b'at crèfiu in pedra e calchina e rena
leadas in terra mia e no anzena!

Tzitzu

Ma omine t’at fatu sa natura
e no’ monte o pranta vegetale,
si retzidu as su donu ‘e su "mentale”
dispostu virtualmente a ogni cultura
b’at aer calchi resone, puru oscura,
chi ti rendet divressu da animale?
E tando, si iscanesu ebìa ti cres,
a sa sola ti das su zappu a pes…!

Antiogu

Deo no mi creo iscanesu ebìa
ca tzitadinu de su mundu só,
ma sas raighinas de sa terra mia
su primu nudrimentu an dau peró,
de su corpus e de sa mente mia
formande sa pessone a bonu pró,
s'alfabetu 'e s'amore imparande
a esser ómine beru totue chi ande!

Tzitzu

Ispreminde ti ses sa chiminzana
po chilcare risposta, caru amigu,
ma fintzas sas farrancas in s’isprigu
za l’ischis chi azudu no’ ti dana..
cando invece cun s’anima andantana
in ue cheres agatas un’aprigu.
Si no istaccas su murru da sa titta
s’anima passa vida derelitta.

Antiogu

So paschinde totu su manzanu
custa criatura chi at sambene meu,
donu pretziadu chi m'at dadu Deus
su cherbeddu e su coro e tenner sanu;
sighinde custu nobile impreu
so amande totu su Genere Umanu
e sigo goi su pretzetu divinu:
"Istima prima 'e totu su 'ighinu!"

Tzitzu

Ma “su ighinu” no’ est solu su ighinadu
in ue amos passau sa pitzinnia:
in dogni zassu chi mi so’ frimmadu
a totu apo istimau che in domo mia,
e a modu sou dognunu at ricambiadu
cun ospitalidade e cortesia.
Est gratzie a su viaggiare si deo como
cumprendo meda mezus sos de domo.

Antiogu

No m'istes chischende pilu in s'ou:
'Prima' no cheret narrer 'subra totu',
Ma 'su primu chi bies, chi as connotu'
Est e narrer su 'prossimu tou'!
Sena che istesiare e logu nou
Ma restande in sa idda tua etotu!
Su poberu sena 'inari po biazare
In 'su piticu sou' podet amare!

Tzitzu

Deo no immentrigo mai su primmu nidu
ma meda ap’imparadu in terra anzena,
za l’ies chi finamentas cudda vena
est prus bundante si ses foressidu;
Beru chi su logu ue ses naschìdu
ti ninnat… ma ti tenet in cadena.
Ben’enniu su colostro e su pippottu
ma como chi so’ mannu pappo ‘e tottu.

*** *** ***

Abrile de 2024, tra Amsterdam e Viterbo