S'ARDIA
Di Lorenzo Brandinu

in onore de Santu Costantinu

Cust'annu cherjo vincher in s'ardia
in onore de Santu Costantinu

si mi busco unu caddu trexentinu
luchidu chi risprendat che coraddu
si trexentinu mi busco unu caddu
est tzertu chi sa groria mi nusco
si trexentinu unu caddu mi busco
in s'isperdida cursa 'e sa garrela
ap'a difender sa prima pandela
da s'atacu chi rezit de continu

cust'annu cherjo vincher in s'ardia
in onore de Costantinu Santu

mi dan su caddu ingresu de incantu
ca semper sa pandela apo difesu
de incantu mi dan su caddu ingresu
chi in cursa s'imberghet a iscaddu
de incantu mi dan s'ingresu caddu
chi volat senza premere in asprone
prima pandela pro sa passione
a brigl'isorta chin onore e bantu

cust'annu cherjo vincher in s'ardia
de Santu Costantinu in onore

si no mi dana baju curridore
m'ingalenana nues de miraju
si no mi dana curridore baju
no afundo suspiros in funtana
si baju curridore no mi dana
cumpeto chin su genere asininu
lis do tzarra pro totu su caminu
e in ciesa nd'istupo vinchidore

in onore de Santu Costantinu
cust'annu cherjo vincher in s'ardìa

si baju ne molente no apo in via
ne portale ne rivu no m'iscapo
si baju ne molente in via no apo
che caddu rude movo prepotente
si baju no apo in via ne molente
finin sos dringhiglios in su traju
si molente no apo in via ne baju
tando li cambio totu sa traschìa
in onore de Santu Costantinu
cust'annu in s'ardia cherjo vincher

si sos giurados si lassan cunvincher
non so unu runzinu e si l'ispassan
si sos giurados cunvincher si lassan
caddu e molente sun disimpegnados
si cunvincher si lassan sos giurados
a pede isfido totu sa contrada
e si caddu e molente non bind'ada
sa cursa a pede l’ap’a istravincher

in onore de Santu Costantinu
cust'annu in s'ardia vincher cherjo

sa gara a pede, a bolu ja l'aperjo
in s'andala 'e s'isfida e su cossolu
sa gara a pede ja l'aperjo a bolu
in lumen de su santu e de sa fede
sa gara ja l'aperjo a bolu a pede
e allijo sa gropera a fronte ciara
a pede a bolu, l'aperjo sa gara
onores meda e premios iscoperjo

in onore de Santu Costantinu
in s'ardia vincher cherjo cust'annu

non zedo su botinu pro s'afannu
che lampu a tzapitare los ispedo
su botinu pro s'afannu non zedo
a pede o chin su caddu trexentinu
pro s'afannu non zedo su botinu
m'est cumparsa s'iscrita pro sa via
e si su caddu ingresu no at zenìa
a pede vinco pro su Santu Mannu
in onore de Santu Costantinu
cust'annu cherjo vincher in s'ardìa

Primo premio (medaglia d’oro) concorso poesia sarda Ozieri
Sez. “tra poesia e cantigu” Antoni Cubeddu

Anno 2018