Si m'artuddan sos pilos
seco su 'erru a dentes
e-i sas ungras juco de atzagliu,
canno narana chi solu est su duttore
su chi podet curare male anzenu,
e mi dimanno: “Tanno ite sò jeo?”.
Non sò unu pintore
però poter cheria
pintare unu quadru arrennegatu.
Canno vido pizzinnos carigrogos
mi punghene in su coro sos colores
ch'at ispartu in sas telas Ligabue.
Unu calich'e samben
ttravasatu caente a ben'a pare
'achet fozire s'arvor'e sa vita.
E riden sos pizzinnos carigrogos
ridene chin sas caras coraddinas
e mi lu prenan su coro 'e consolu.
Da chi so arribanne a su tramontu
e non poto prus sambene donare,
pensenne a sos pizzinnos carigrogos
che sole cann'ispuntat su manzanu
un'iscutta m'arreo a pilos rizzos.