S'arzola assoliada
di Larentu Pusceddu

(Ritu anticu de fecundidade)

In s'arzola assoliada,
su samben lu suspiat
su pruere assuttu.
Su trau ruttu
imbrastiadu de cascasina frisca,
fit affocande in s'ispruma.

Dae sas nastulas
istrussiaiat salia
a cada isulfida.
Si tremiat che catteddu
affrittoridu.
Sa morte brincaiat
sutta de su sole de austu
suliertandeli su coro
semadu dae un'ispada atarzina.
Imbeladu, su trau at bidu,
prima de morrer,
una femina ermosa
cun sa cara increpuddida
colandesi sas manos fines,
illinidas de samben purpurinu,
supra su sinu nudu,
in sas cossas brundas
e in sas imbenas siccas.
Tando at cumpresu, su trau,
proite sos corros suos
fin pintados
in sas buccas isformadas
de sas domus de jana.
E at pensadu dolorzosu
a sas tancas birdes
inue at sartiadu fecundu
sas trailas suas
chi impresse l'an a ismenticare
che sa femina ermosa
chi sos cozones
a carches l'at picadu
pro li naschire in sinu
vida noa.

(2° premiu - Durgale 1986)