MODA PO SA FESTA DE SOS SARDOS

Enea tristu at fattu s’Emigrante
Ca che teniat Troia distruida
Dae sos gherrieris Ispartanos
Mentre invece sos Sardos Isolanos
Essende sa Sardigna ancora in vida
Partin tristos in numeru importante
Problemas dolorosos problemas
Maladias de varios sistemas
Pesantes e dolorosos problemas
Maladias de sistemas varios
Gai sos Sardos che sos mercenarios
An’espostu sa vida a chentu azardos
Gai che sos mercenarios sos Sardos
Tottu sas sette dies de sa chida
Diventan de obbligu avventurosos
Pesantes problemas dolorosos
Maladias de varios sistemas
Pesantes dolorosos problemas
Maladias de sistemas varios
Gai sos Sardos che sos mercenarios
An’espostu sa vida a chentu azardos
Gai che sos mercenarios sos Sardos
A chentu azardos espostu an sa vida
Tottu sas sette dies de sa chida
De obbligu avventurosos diventana
Cando poden torrare si contentana
A s’insoro natale terra amada.

In cantas partes de su mundu nd’ada
A chi est manovale a chi in arte
A chi istat bene a chi male
A chi tribagliat sa note o sa die
A chi est poveru e a chi at dote
A chi est sanu a chi est in ricoveru
A chi est vicinu a chi lontanu
A chi est arrivadu a ch’in camminu
Cust’est sa vida ’e su Sardu Emigradu
Cantas boltas che animas affrantas
E nd’at de su mundu in partes tantas
A chi est manovale a chi in arte
E nd’at de su mundu in tantas partes
A chi in arte a chi est manovale
A chi istat bene a chie male
A chi tribaglia su notte o su die
A chi istat bene male o chie
A chi tribagliat sa die o sa note
A chi est poveru e a chi at dote
A chi est sanu a chi est in ricoveru
A chi at dote e a chi est poveru
A chi est in ricoveru e a chi sanu
A chi est vicinu a chi lontanu
A chi est arrivadu a ch’in camminu
A chi lontanu a chi vicinu
A chi est in camminu a chi arrivadu
Cust’est sa vida ’e su Sardu Emigradu
Cantas boltas che affrantas anìmas
Ma ue siat montes valles cimas
Penzat a sa Sardigna in generale
A s’insoro terra amada natale.

Torret dognunu prestu e puntuale
Cun sa famiglia e totu su restu
E su chi finz’a oe no at connotu
Tenzat in su futuru a bonu proe
E canta canta inie si tratenzada
Cuntentu e felice in paghe santa
Siat cittade borgata e comunu
Torret prestu e puntuale dognunu
Cun sa famiglia e totu su restu
Torret dognunu puntuale e prestu
Cun sa famiglia e su restu totu
E su chi finz’a oe non at connotu
Tenzat in su futuru a bonu proe
E su chi non at connotu finz’a oe
In su futuru a bonu proe tenzat
Canta canta inie si tratenzat
Cuntentu e felice in paghe santa
Si tratenzat inie canta canta
Ca l'at s’Isula bella sempre in coro
A s’amada natale terra insoro.

Ca deo puru sa Sardigna adoro
Ispero ’e bi torrare in su futuru
Ca sa Sardigna adoro deo puru
Ispero in su futuru ’e bi torrare
Cun bois Sardas Sardos tot’impare
Passande paris felices momentos
Ismentigande penas e turmentos
Bos cunfido in s’Alta Onnipotenzia
In su regnu de Santas e Santos
Pro esser peur comente not’esta
Sardas e Sardos caros totugantos
Cuntentu ’e ch’aer fattu bella festa
Bos lasso unu saludu in permanenzia.

Parigi, 25.03.1982

Serafino Putzolu