S'isposalizziu Abissinu
di Gaspare Mele

A tie conto custas cosas bellas
e a meda zente de su mundu ancora
chi aman de su presente sas novellas.
Qust'est usanza de sa zente mora:
sa vidanzada pomposa e mudada
tres bias brincat sa sua dimora,
poi da sa zente sua accunpannada,
a sonons de tamburos e tintinnos,
la presentan'a s'isposu carazzada.
Inie ballos, fantasias e innos
fachen pro s'isposu e pro s'isposa,
esclusas sas pitzinnas e pitzinnos.
Tando s'isposu chin manu virtuosa,
occhiet in sacrifitziu un'animale,
cumandu de sa lezze religiosa.
Chin su sambene tinghent su portale,
su pettus, su pè destru de sa femìna
e de sa domo su palu centrale.
Custu est zuramentu e divìna
cosa de s'issoro matrimoniu,
pache de unione genuina.
Ponent pro fuire su dimoniu
sos corros a ruche in sa janna
e pro fortilesa de matrimoniu.
Mentres che sa femina pius manna
isperzat sa domo intro e fora
chin fumos de istratzos e canna.
S'isposa che una nobile sennora,
settida in s'istoja pès a ruche,
nàt e pretendet dae s'isposu ancora.
"In ziru pro sa domo, a mie juche!"
e poi chi su ziru hat finidu,
nàt:" a sos ocros mios , daeli luche!"
Tando s'isposu, cuntentu e bramidu,
li leat sa caratza e si l'abbratzat
e la presentat a tottu su partidu.
In su mentres s'isposa si nd'istratzat
dae trucu retzettas e collanas
e sas noas de s'isposu rimpiatzat.
Tottu sos invitados, tando dàna
su donu issoro de s'issoro brama,
e los abbratzant e fortuna lis dàna.
Pranghende, su babbu e sa mama
de s'isposa e de s'isposu s'avicinana
e unint de duas candelas sa fiama.
Atteras feminas betzas cochinana,
s'isposa in artu istat setzìda,
sos chi li colan dainanti s'inchinana.
Eccco! sa cerimonia est finida!
manican tottu contande sa sua
esperientzia e grandesa de sa vida.
Latte, erba areste, petha crua
est su pranzu de sa mezus die
cun bibitas acras che lua.
Poi ch'hana pranzadu rie rie,
s'isposu e s'isposa pedini
su permissu a tottu sos de inie.
Si custos su permissu li cunzedini,
si che andant a lettu tottu cantos,
mudos mudos s'intenzione si medini.
Cando torrant sos isposos, cuddos tantos
dimandant a s'isposu si est cuntentu.
Sichini fantasias, ballos e cantos.
E durat gai su divertimentu.
Durat dies e dies de sichìdu
fachende a sos isposos cumplimentu.
Custu happ'isperimentadu, connotu e bidu!

Chisimaio, Somalia su tres de Triulas de su 1936