S’ISTRADA DE SA VIDA MIA
Luisa e Pietro Chessa

Sos coloridos ammentos lontanos
ispramminados in s’istrada mia,
si presentan ogn’ora, ite manìa,
a suguzare s’andanta ‘e sa vida.

Est un istrada longa, presumida,
cun rosas e colovros, violettas,
sun sognos faularzos e velettas
fattas pro fagher dannu a su reposu.

Bido pasculos birdes chi dan gosu
e aberin a s’istante sa memoria,
de una gioventude senza gloria,
de profuumos perdidos in s’istrada.

S’ammentu caru d’una mama amada
est in s’istrada mia pro dilectu,
s’amore chi m’hat dadu a-i s’affettu,
est biu in s’istrada ‘e sos ammentos.

In su camìnu meu milli appentos,
piagherosos amigos amados,
lestros che i su tempus sunu andados,
cancelladu han sas amenas visiones.

Gai passan sas generaziones
de custos fizos bellos de su mundu,
faghen s’istrada nostra fin’a fundu,
ben’e saludu lis auguramus.

S’amus fortuna e nos agatamus
est motivu de soddisfazione,
a nois bezzas dan sa pinzione
e sighimus s’istrada passu passu.

Finidu ch’est su tempus de s’ispassu
s’Onnipotente nos hat a mutire,
s’istrada noa devimus sighire,
s’ultimu andazzu nostru designadu.

Custu distaccu ch’est già preparadu,
ogn’un’e nois che leat lontanu,
deo m’appronto, sos trastes in manu,
pront’a leare cust’ultima via:
cust’est sa fine de sa poesia!….