S'istraniera
di Vittoria Calzaghe

So pro vint'annos istada emigrada,
Patria cara, senza idere a tie,
Ma su tempus chi so restada inie
Sempre comente primu t'happo amada.
Non t'happo unu momentu ismentigada
In sas oras notturnas e su die
Ca tue notte e die sempre arreu
Fist continu serrada in coro meu.

So partida sonniende cun s'ispera
Una die de poder rientrare
De torrare unu die a t'abbrazzare
Ca de te terra mia ando fiera
Sas linnas, sas montagnas, sas costeras
Sas baddes, sos nuraghes e su mare
Custos pro me fin sos caros ammentos
Chi in coro haia tottu sos momentos.

Cara Sardigna sas sacras alturas
Chi tenias, chi tenes e in futuru
Ispero torre ammirare siguru
Basta che fiza tua a mie imbares
Ispero un’acoglienzia mi prepares
Goi eo happa fagher pro te puru.
In custos annos Sardigna istimada
No ischis canto a mie ses mancada.

Cant'est trista sa vida ‘e s'emigrante
Nostalgica, malinconica continu
E i sa zente chi t'istat vicinu
Sa mantesi ti rended pius pesante
E cando dae te fia distante
De torrare haia su pedinu
E como invece chi so rientrada
M'agato peus d'essere emigrada.

Mi sun mancadas certas amicizias
Chi a sas cales aberu tenia,
Mi sun mancadas, o patria mia,
Cun issas sos effetos e delizias
Custu suzzedidi pro sas ingiustizias
Chi a meda non donan garanzias
E los custringhene a girovagare
Chirchende su tribagliu a si campare.

Fizos fieros de sa nostra Italia
Devimus essere tottugantu unidos
Sos chi emigrantes sun partidos
In Belgiu, in Germania e Australia
Abbandonende sa terra natalia
Ca fin dai bisonzu pissighidos
E fin custrintos comente a mie
Pro custu fattu abbandonare a tie.

Italia mia, sos antigos murus
In vint'annos no happo ismentigados
Dai comente los happo lassados
Sun malandados e pagu siguros
Issos puru han connottu tempos duros
Che nois poveritos emigrados
E nos signalan cun s'issoro presenzia
Sa parte de sa nostra decadenzia.

Finas in mesu a sa difficultade
Ammentàda mi so sempre de te
Happ'operadu comente Mosè
Fuende pro sa vera povertade
Tue senza peruna dignidade
Non ti ses ammentada pius de me
E m’has trattadu cun d'una manera
Chi ancora mi parzo istraniera.