S'isula de sa fortuna (a Flora)
di Paulicu Mossa

1.
Ite pensamos fagher, Flor'amada,
In custa terra ingrata traitora?
Non bides cantos viles a un'ora
Chircan s'amore nostru avvelenare?
Flora mia ponzemus pe' in mare,
Andemus a sa terra fortunada.

2.
Ispettende nos est de sa fortuna
S'isula fortunada veramente,
Ue in festa continua sa zente
Vivet senza molestia peruna;
Nè b'incontran sos rajos de sa luna
Luttuosas iscenas de piantu:
Inìe est tot'incantu e de s'incantu
No si poden sos coros saziare.
Flora mia, ponzemus pe' in mare.

3.
Est motivu de gioia e de consolu
Cantu ti si reparat a sa vista:
Su culumbinu, sa turture trista
Cantend'amore leana su ölu;
E-i s'armoniosu russignolu
Pienat de lamentos sa campagna,
Ma non tardat sa dozile cumpagna
Cun versos de amore a lu giamare.
Flora mia, ponzemus pe' in mare.

4.
S'abe brunda, sa pinta mariposa
Sighin s'amante da-e rampu in rampu;
Nè b'hat fiore in buscu, arvur'in campu
Chi non ti mustret s'indul'amorosa:
Su giorminu s'istringhet a sa rosa
E s'abbrazzat a s'ulumu sa ïde,
Immagine perfetta de sa fide
Ch'inìe solen tennere in amare.
Flora mia, ponzemus pe' in mare.

5.
Est pro vida s'amore professadu,
Han sagros sos affettos già promissos;
E pro cussu pioet subr'a issos
Ogni grascia chi Deus hat formadu:
Su terrinu produit senz'aradu
Laores cantu nd'hat in bidatone;
Sas arvures de fruttu ogn'istajone
Dan fruttos de sabore singulare.
Flora mia, ponzemus pe' in mare.

6.
Totu in cussu beneficu orizzonte
Est abbundanscia e vera biadìa;
Benit mancu sa ruzza limba mia
Pro chi sas maraviglias tinde conte.
Fina da-e sos chercos de su monte
Be-i curret su mele a perdimentu
E chito su manzanu andat s'armentu
De per isse su latte a presentare.
Flora mia, ponzemus pe' in mare.

7.
Ite piùs? S'ierru a larga manu
Non bi ëttat da-e altu abbas e nies
Ne-i s'istiu inzendiat sas dies
Cun caldanas de sole fittianu ;
Pezzi sempre in delissias d'ëranu
Passan inìe su tempus insoro,
Un'aeritta cun alas de oro
Faghet solu sas fozas tremulare.
Flora mia, ponzemus pe' in mare.

8.
Posca in totue padros e giardinos
Sullevan de profumos una nue,
Allegros puzoneddos in totue
Cantan umpare, faghene festinos;
In totue rizolos cristallinos
Rinfriscan sa campagna fiorida...
Vida de Paradisu est cussa vida,
E proite tardamos a b'andare?
Flora mia, ponzemus pe' in mare.

9.
Andemus, s'est ch'abberu m'has amore,
Ma giuremus torrare in custa terra,
Da chi no hat a fagher piùs gherra
A columbos e turtures s'astore;
Su leone de feras distruidore,
Dare cazza non det piùs a fera,
Nadare den sos pisches in s'aera,
E in s'abba sas aes den bolare.
Flora mia, ponzemus pe' in mare.

10.
Da chi pro maraviglias de avanzu
Su rù hat a bundire senz'ispina
E de sa giorva s'aspra raighina
Fruttu det render su piùs liccanzu;
Da chi nascher in mare det s'aranzu
E brancas de coraddu in sa foresta;
Tando mancari muat sa tempesta,
Isolvemus sas velas pro torrare.
Flora mia, ponzemus pe' in mare.

11.
Però custas aeras ti sun caras
E da-e te traith abbisu so...
Ahi! ch'in coro tou has nadu: no,
Mancari non l'isplichene sas laras...
It'has determinadu? ite mi naras?
In modu risolutu ti cumporta:
Ma de perder a mie t'accunnorta
O chirca custos dubbios lassare.
Flora mia, ponzemus pe' in mare.

12.
In s'istante sos dubbios ammella,
Ca, si no, cantu prestu m'ïdes mortu:
Allestrida sa nae est in su portu,
Andemus como, Flora mia bella...
Propiziu su ëntu e ogn'istella
Nos faghen a partire violenzia…
Oh gioja! tue has fissu sa partenzia
E non cherzo un'istante durittare!
Flora mia, ponzemus pe' in mare.

13.
Finis acconos intro a su navìu,
Sa vel'est tesa e dadu est su segnale..
Adìu, dura patria fatale,
Parentes e amigos totu adìu;
Como bos lasso e cantu duro ïu,
Cun Flora parto a logos differentes;
In issa amigos, patria, parentes
In Flora ogni contentu app'a lobrare!
Flora mia, ponzemus pe' in mare.