S’isveglia ‘e tiu Bakis
di Antonio Longu

De s’isvegla ch’haiat tentu in sorte,
tiu Bakis nde fit meda cuntentu,
ca fit bona e pretzisa, unu portentu
soliat narrer, cun accentu forte.

Una die però si fit frimmada
e bi fit adduradu troppu male,
prite fit una cosa inusuale,
essende a dogni proa abituada.

Sa fritza car’a terra fit puntada,
non daiat de vida unu signale:
eppuru fit de marca, originale,
tenta in contu e bene appretziada.

Chircadu haiat tando ‘e l’aggiustare,
prite ancora bisonzu nde teniat,
però sa fritza in pè non b’istaiat,
lena a sas sese soliat torrare.

Su reiojarzu, chj li fit amigu.
bi l’haiat da poi ispiegadu,
chi s’ngranaggiu si fit ispanadu
e retzer non podiat mancu azzu.

Tando pensadu b’haiat afundu,
e tenta non l’haiat prus in contu,
ca issu puru car’a su tramontu
andande si che fit che cosa ‘e mundu.

In pensamentu sò como ‘eo puru,
ca sa chi hap’in cunsigna e tenz’istima,
non funzionat prus comente a prima:
ma non cherzo chi ruat in s’incuru.

L’hapo a trattare cun delicadesa,
bastet chi mi nd’ischidet su manzanu,
si nd’abbisonzat sa fritza cun manu
l’hap’agiustare, si non tenet presa.

S’ispera est chi mi duret in betzesa
mancari chi non sonet fittianu:
bastet chi cantet che cucu in beranu
pro la congruer sa vida in bellesa.

Si non s’avveran sos disizos mios,
comente hat fattu Bakis fatto deo:
s’isveglia che la ponzo in su museo
prima ‘e dare a su mundu sos adios.

Manzione d’onore al Premio di Poesia Sant’Antoni de su o’u di Mamoiada 2007