S'olia de su Donodiu
di Francesco Sanna

Giordania, 2001

A s’amigu Frantziscu Marras chi est pulinde

Semper a manos boidas torraiat
cudda culumba da Montrigu 'e Reos(1),
mi fuin beninde pensamentos feos..
e cando mai nessi unu rampu 'e olia ?

“Segundu me s'est perdia in calchi ufficiu”
mi narait cudda macca Fidelena,
ma comare Isperansa, prus serena,
da su chelu isetande fu’ s'auspiciu.(2)

E su chelu za l'at accuntentada
c'addecolla culumba canta canta
istringhinde in farrancas una pranta
chi in Iscanu l'aian recumandada.

Ma foltzis fu’ partida in malu astru
o l'an post'ogiu sos chi tenen odiu,
fatt'istat chi s'olia de su Donodiu
arrivada mi nd'est chi fuit ozastru.

***

E puite mi faeddas de fastidiu...?
De cando as'esser mortu sutta terra ?
Ancora de cumbatter amos gherra
ca sos coros de Amore tenen sidiu !

Ma gia chi su faeddare as tantu grae
puite abarras in terra de siccagna ?
Mira no t'epen fattu calch'intragna
sos chi tenen de s'animu sa crae.

Za l'ischis ch'in sa terra de uscra-deos
s'albure 'e olia male si la passat,
mezus li tiat cunfagher terra rassa
che i sos roccalzos de Montrigu 'e Reos.

E deo ch'israighinadu apo sa pranta
pro aer in terr'anzena mezus sorte,
como no timo prus mancu sa morte,
ca si molzo za molzo in Terra Santa.

***

Frantziscu so cuntentu ch'as iscrittu,
t'istimo e mi ses caru che unu frade,
siat pro disvagu o pro netzessidade
cando benis ses semper bene-itu.

A ti narrer sas novas cun apentu
prus mezus mi tia isterrer a chistionu
ca pagu in su paberi bi so bonu
a-friscare cun arte dogni eventu.

A mie no m'est tocadu cussu donu
de cantare de s'animu a tenore,
e a di chi tira bentu a chirriu 'e Amore
est meda si mi nd'essit calchi sonu.

Ma tue, ca za ses bonu intendidore,
mancari su talentu sia metzanu,
giudica su cantare si est profanu
o est lode de teraccu a su Segnore.

***

Ca no b'at che recatu musulmanu
po s'albeghe ismarrida 'e su Messia
e non s'isciuccadura isaborìa
de sos istelzos de su Vaticanu.

Est grassia a cudda Rosa de Sorìa
si torrada in Europa est sa cultura
cando fit gia sa Cresia in era oscura
briva de Fide e de Sabidurìa.

"Su moro chi est pigadu a cobeltura"
fattu nos at sas bovedas a vela,
ateru che sos contos de carrela
"a no che 'ogare sa teracca a fura".

Sa Corsica l'at postu in sa bandela,
e battoro nde tenet sa Sardigna
cun rughe rugia in d'una bianca insigna(3)
ahi... si podiat faeddare cussa tela !

Tue matrona romana no ses digna
de pascher in sa terra 'e sos nuraghes:
d'esser ricca e moderna ti cumpiaghes
e in logu 'e trigu semenas gramigna.

Abaida su ch'as fattu e su chi faghes,
no l'ies chi ch'est finidu s'ozu santu
e sun untas sas caras da su piantu
de sos chi sufferentes chilcan paghe.

Custa terra ch'innanti fit incantu
po zente chi acudiat da dogni logu
como est tottu brusiada da su fogu
e tue chilcas ancora onore e bantu !

***

Peldona caru frade cust'isfogu
ma est bennidu che isturridu improvvisu,
e cand'enit s'isturridu est pretzisu,
za l'ischis, de li dare disaogu.

Ma lassamos su prantu po su risu
e finimoche custa cantilena
ca culumba mi paret puntilena
disizzosa 'e torrare a Iscanu Pisu.

Saludos da Isperansa e Fidelena
chi ti cheren faeddare de pessona,
e duncas sedda s'ainu… e it'orobbona
no ses mancu leadu da gangrena !

Serrande s'est sa vena d'Elicona,
mi dispedo, e s'invitu rinnovande,
ti saludo... adiosu ti so nande,
si t'apo dadu pena mi peldona.

Sa vena d'Elicona s'est serrande,
peldonami si t'apo dadu pena;
d'Elicona serrande s'est sa vena,
prega semper ca deo za so pregande.

*** *** ***
---------------------------------------------------------------------------------------------
1) Un rione di Scano
2) Dal latino avis spicere: osservare il volo degli uccelli
3) I Templari in quel tempo avevano ottimi rapporti con gli esponenti del Sufismo