Cantidu sardu
fattu tra s’isettore
e su contribuente

1. contribuente

Cand’enidi a esizze s’isettore
Pare chimbidda non chepa nessuno
Tott’inchizzidu e de malu more
Ndegominzada andare calecunu
Sempre pagande sena e valore
Custu este seccante e importunu
Ndapo unu picculeddu appena izzu
Non bastada a pagare safoghizzu

2. esattore

A comente mi ghere faeddare
Non parede aresone tantu bella
Sinò aia tentu ite pagare
Non laiana ettadu sa cartella
Non ba bisonzu de s'inchietare
De parare peruna gautella
E tirrias po gussu non dispragada
Pagu nde tenede pagu nde pagada

3. contribuente

Ma deo non so tontu ne imbecille
Sò unu chi cumprende s'arresone
Est unu piculeddu de ortigheddu
Chi non bi passa mancu su matzone
Si ch'essicadu in su mes’earbile
Un’annu prenu chi lapo a marrone
Est’unu logo chi no a valore
Ite ghere chi paghe a s’isettore

4. esattore

Sia mannu o siada piticcu
A mie gussu pagu minde faghede
O sia logu friscu o logu siccu
Su chimportada a mie es chi mi paghede
Non suni benes coment'unu riccu
Cussu finasa a mie dispiaghede
Ma si paga conforma su chi tene
O sia meda o pagu su bene

5. contribuente

Parzo sempre paghende una cundanna
Commente tentu chessere un’imputu
Sessere messi una tanca manna
Ia pagadu de su propiu fruttu
Sò ispozzadu commente una canna
Cun pagu mandigare e finas bruttu
Pagare pagu chi est possidente
No a chie non tenede niente

6. esattore

Ma mirade ca est impertinente
Chi mi faghede male faeddare
Non mind'enzada a faghe sisolente
E ne mancu mind'enzada a brigare
A innoghe si enidi prudente
Si beni solamente po pagare
Si non cheret pagare de su restu
Tanto bi lasso unu secuestu.

7. contribuente

Si beni puru a secuestare
Non mi faghede peruna impressione
Cussu chi lad'ass’asta a comporare
Ad essere unu bellu tontorrone
Non lada cherrede po lu piantare
Aranzos mandarinos e limone
Si andada a lu bie so securu
Chi mancu bei giampada su muru

8. esattore

Custu ziu mi parede curiosu
D'essere goi non mi lu creia
A pagare a tottus es costosu
No est chi si lamente foste ebbia
E però a pagare este forzosu
Sa legge es fatta de gussa zenia
Ca devo dare su contu aggiustadu
Po barte mia e po bartes sistadu

9. contribuente

Deo sò de minore isfortunadu
Naschidu in mala luna e in malora
Sa terra a rata milapo prestadu
Iscurigheddu si lu eppo ancora
Cando m'atopada a fronte caladu
Nde denzo irgunza de issire fora
Gi'apo s'idea de si lu dorrare
Ma mai minde bodede avanzare

10. esattore

Ma foste o lu brestede o l'agatede
Amie non m'importada niente
Baste chi su inari nde lu atede
Commente e bonu unu contribuente
Ite si sie mediu chi fatede
Ma laverto chi meda non istendede

11. contribuente

Una cosa li gherzo domandare
Iscuse si li fato cust'afrontu
Si beni calchi cosa a mi mancare
A mi lu tia faghe calchi iscontu
S'inari chi imbusacca appa'portare
Cussu a lu dare gia so brontu
Ma si mi mancada alcuna cosetta
Zai mi lada a faghe sa brulletta

12. esattore

Deo non nde li vato de bulletta
E ne li vato iscontu peruno
Foste mi faghede sa rata cumpreta
Commente mi la paga dogniunu
E si li manca alcuna cosetta
Si lu impresta dae calicunu
Deo non fato de cussa zenia
A mi lu ponne de busacca mia.

13. contribuente

Como pius dolore mad'aggiuntu
Meda prus mannu de satera orta
Si ando dorra a nde faghe preguntu
So certu manco m'aperi sa borta
Ma po ennere goi a gustu punto
Menzus chi sa pessona sia morta
Ite che vato inoghe a ch'istare
Si no apo manera e mi campare

14. esattore

E già chi este che disisperadu
Chi finasa a sa mente este confusu
Boghechelu de mesu su cunzadu
E de su pagamentu enidi iscrusu
E gai bivede tranquillizadu
Sos pagos’annos chi chistad’imprusu
Sistrumentu lu faghede aterunu
E gai no lu crica prus nessunu

15. contribuente

Fostè faedda degussa zenia
Ma a mie su l'intendede mi dà pena
Mi l'aia lassadu mamma mia
Po no andare a s'agos'anzena
Calchi faschina de frasca fozzia
Po calchi orta a mi faghede sa ghena
Ca furare non sò abituadu
E timo po non bennere arrestadu

16. esattore

E si puru l'esserene arrestadu
E postu chi l'esserene in presone
Atteru che fostè nde abistadu
Suni cosas de combinazione
E finas pagos’annos a passadu
Chi b'aiada finas unu Barone
Sas presoness suni fattas po sos bios
E non po sos chi suni sepellios

17. contribuente

Deo faeddo a pianu pianu
Chi sempere apo dentu pagu briu
Apo paura ca sò anzianu
C'apo sos settantannoso compriu
E poisi seo puru pagu sanu
Non sò securu de ndessire biu
E si che morzo in calicuna cella
Za l'onoro sa mia parentela

18. esattore

Deo già non li naro prus niente
Za est mannu unu chi cumprendede
Za chi ch'essidi tottu differente
Non m'importa lu lassede o lu endede
Però faghe sa vida seguente
Si lu lassa li dorada a ispendere
Como lu semus nende pari ari
Lu endede e si dene suinari

19. contribuente

O deus ite vida sufferente
In sa condizione chi m'azzapo
Itte mant'annarrere sa zente
De sas criticas tanto no m'iscapo
Sas limbas mi lu nanta facilmente
Chi gustu mi lu bufo e mi lu bapo
Ma si no este gai a la finire
S'isettore mi mandada a pedire

20. contribuente

De gussu non m'importada niente
Si lap'endidu fidi cosa mia
Deo la lasso narrede a sa zente
Su mundu est fattu degussa zenia
Non nde narada a mie solamente
Sa limba mala brusada chi sia
Deo lapo endidu e pagadu in oro
Cussos chi fettan su dovere insoro

21. contribuente

L'aia fattu a sa moda antiga
A mi mi lae bendidu deora
Za non fia istadu briga briga
Dae pagare frastimende sora
Sempere a boghes commente una piga
Intendidemi finas sos de vora
Como non brigo ne fatto ispompillu
Mi corco e mi dormo trancuillu

22. contribuente

A ischidi una gosa s'isettore
Custa orta ap'endidu su cunzadu
Lapo endidu a gompare Salvatore
Zattu in oro mi lada pagadu
Fia sempre inchiettu a malumore
Sempre pranghende e indepidadu
Como non brigo ne fatto pilissu
E s'isettore s'arranze cun’issu.