S’Isperu
di Maria Luisa Pisanu

Filaiada istuppa a lughe 'e luna,
sezzida in su zannile ‘e pedra lada,
cun sa manu gallosa, insaliada,
tirande trama lunga a una a una.

Su fusu giraiat, sa fortuna
l'aiat dae meda abbandonada,
sola, misera, trista, isconsolada,
prena ‘e fele e d'amore zeuna.

Como, in isetu chi sa sorte mala
boled' attesu in biccu 'e puzone
e, che bentu, s'isperdada in s'aera;

cun s'alidu 'e sa noa primavera,
tessinde lana modde e corizone,
sa fortuna l'amparet sutta s'ala.

Secondo Premio al Concorso di Poesia “SU CASU”, Sindia (NU), 18 dicembre 2011