Sa vida est che su mare
chi sas roccas infundet,
las mazat, las forrogat e carignat.
E in su bantzigare
cun issas si cunfundet,
las mudat cun su tempus e las signat.
Si miras s’orizonte
nudda bies de fronte;
attesu issu a su chelu si cunsignat.
Non lompet sa mirada
inube s’ultim’ora ch’est cuada.

E che rocca m’intendo,
dae su mare infustu
chi mi consumit intro, abbellu abbellu.
Sos bisos mios rendo
a su tempus bedustu
cun cantu m’at cuntzessu de prus bellu
in s’ispunda nadia,
ube a sa vida mia
paro fronte cun s’ànimu rebellu.
E m’abbratzo cun issa,
in chirca ‘e li furare una promissa.

Undas altas mi ferin
cun bentos de traschia
e mi perdo in sa néula isprumosa.
Su coro meu abberin
sas bramas d’una ‘ia,
ca m’est sa vida ancora pretziosa.
Donzi pena che frundo
e de lughe m’infundo,
innanti ch’intret sa notte iscurosa,
cando at a benners’unda
po mi ch’ispingher a s’àtera ispunda.
______________________

La sponda natia

La vita è come il mare
che bagna le rocce,
le percuote, le fruga e le accarezza.
E nell’ondeggiare
con esse si confonde,
col tempo le cambia e le scolpisce.
Se guardi l’orizzonte
nulla vedi di fronte;
al cielo esso, lontano, si consegna.
Non arriva lo sguardo
dove l’ultima ora si nasconde.

E come roccia mi sento,
bagnato dal mare
che mi consuma dentro, lentamente.
I miei sogni cedo
al tempo passato
con quanto di più bello mi ha concesso
sulla sponda natia,
dove la mia vita
affronto con l’animo ribelle.
E con essa mi abbraccio
cercando di rubarle una promessa.

Onde alte mi colpiscono
con gelidi venti
e mi perdo nella nebbia schiumosa.
Aprono il mio cuore
le brame di una volta,
perché la vita mi è ancora preziosa.
Getto via ogni pena
e mi bagno di luce,
prima che subentri la notte oscura,
quando arriverà l’onda
che mi trascinerà all’altra sponda.

24 febbraio 2016

1°Premio alla 4^Edizione del Premio di poesia in lingua sarda “Saboris e coloris de Iscroca” ESCOLCA 25 giugno 2016