S'istadu 'e Sardigna
di Melchiorre Murenu

Ite risolves, povera Sardigna,
Subr' a tantas disgrazias connotas,
Sos peccados t'han fattu gasi digna
De flagellos, castigos e azzottas.
Motivu, veramente, chi t' insigna
Ca tenes pagas animas devotas;
Servant sas azzotas insufribiles
Contr'a benes costantes e movibiles.

Mira sas istagiones cambiadas
C' affligint su coro in sas intragnas.
Fritturas, in s' atunzu, antecipadas.
Isteriles, patidas sas campagnas.
Abbas, in s' ilgerru, illimitadas.
Beranos oppremidos cun siccagnas.
E in sos istios, arias superbas
Pro cunvertire in pruer' sas erbas.

Osserva sas cunsorzas irricchidas
Chi tenias de tantu bestiamene,
Miralas como, si sunt rivestidas
Demedas cadaveres e ossamene.
In carrelas e domos affligidas
No incontras chi sidiu e famene.
S' antiga delizia chi gosais
S' est mudada in ojs e guais.

Si ti miras sos poveros presentes
Non lis osservas samben' in sas laras,
Ca sun bivind' 'e cibos puzzolentes
Cun erbas mesu siccas e amaras,
Bendidas tott' a prezios dolentes
Sas tancas chi teniant pius caras,
Como medas famidos e distruttos
In bassu disisperu sunu ruttos.

Isculta sos dolentes contadinos
Cando passant in similes tancados,
Pianghinde sos perditos terrinos
Pro una bagatella alienados,
" Custos annos afflittos e mischinos
Nde sumus pro sempre espropriados,
Como s' agricoltura pro campare
Non temimos in ue de l' impreare ".

Cuddas crudele mancias e punturas
De sa grande muschitt' arrabiada,
Sunt presentemente sas congiuras
De s' imbidia ingiusta reprovada,
Aunimos sas falsas imposturas
Iscreditande sa prus onorada,
Chi da-e sas punturas cuddos primos
Medas interamente nde sunfrimos.

E-i cudda randinata tant' ardente
Chi distruesit piantas e fruttos,
Nd' hamus bidu in su tempus presente
De fiores allizzados e iscuttos,
Causa de su 'entu in continente
Sos menzus ausilios sunt distruttos,
Si congluat e duncas in duellu
De no esser diversu su flagellu.

Pregade cun suaves documentos
Meda pius a sos illuminados,
Chi mustrene sinzeros sentimentos.
Invec' 'e sos esemplos male dados.
Si sunu de iscandal' istrumentos
Benint severamente castigados,
Ca sende malos sos superiores
Diventant peus sos inferiores.

Unu chi mustrat malu esemplare
Occupat de iscandal' un' iscola.
Menzus fit a su trugu a s' attaccare
Una pesante labide de mola
Prezipitande in profundu mare
Sa sua iscandulosa vida sola,
Ca si restant viventes peccant peus
Assassinande sa 'inza de Deus.

Melchiorre Murenu