Cantas illusiones comporadas
in sas butegas de sos faulalzos,
ajò sardos, pesade sos furcalzos
ca est ora chi nde sian betadas.

Est bastante su dannu e disacatu
chi an fatu in custa terra beneita,
ajò sardos, bortade sa berrita
si nono sighit custu disbaratu.

A muntonalzu an leadu sa terra,
a giogu s’an leadu sos sentidos,
cuntentos de nos bidere afligidos
che teracos nos mandan a sa gherra.

E su pastore an puru arruinadu
cheren sas terras, cheren custu logu.
Su male los consumet e su fogu
puite cussu solu an meritadu.

Morinde semus e chentza ativesa
chi miseros nos lassat e mischinos,
bastat cumprire, bastan sos inchinos
coragiu bi cheret e fieresa.

Sa Limba faeddadela totue
in montagna, costera e pianalzos,
Nadelu a tzitatinos e biddalzos:
“ Mira chi deo so sardu… e tue ? ”