La pace e la concordia volete
tutti i redenti dell’umanità
fate compatti la guerra al prete
che tutto ci toglie e nulla ci dà

1
Dae cando sa Franza in’orridida
esiliadu c’han padres e monzas
sa terra italiana s’es bestida
de iscalzonados, pestes e brigonzas
ndes finas sa Sardigna corrumpida
de sas massa istupidas e gonzas.
O tottu devotas e santicas
sun diventende poveras e riccas.

2
Sa Sardigna, fervente religiosa
fin’a s’ossu es sempr’istada
che sa zente bezzona e tabaccosa
bistaian in cresia a s’ispensada
como, mudada aspettu in d’ogni cosa
sa zent’ezza b’idimos ritirada
sas giovanas simpaticas e bellas
attendere ad altares e cappellas.

3
Oe sos Gesuitas, Franziscanos
an’invasu sas biddas e zittades
e pro piggiare a tottas duas manos
istituesin tanta soziedades!
Cherides essere bonos cristianos?
A unu santu bos arruolades
e paghende a su santu sas quotas
sezis bonos devotos e devotas.

4
Diffatis oe sa devozione
est’infettende in d’ogni abusu
si sacrifican siendas e persone
po su coro de Maria e de Gesusu
iscapolares, medaglia, cordone
guardia de onore e piusu
e tottu s’interessu bruttu e nettu
de compare Rettore est a profettu.

5
Deus si deve servire e amare
chie lu negat est zente canaglia
ma…si podet servire e adorare
senza giughere cordone ne medaglia
cosas can’inventadu po’ lucrare
s’infame razza e sa preidoraglia
chi cun soziedades e cungregas
sas crescjas trasformadu an’in buttegas.

6
Cosas indignas, sacrilegas, feas
su seculu ventesimu est mustrende
chimbe soddos de tassa, a sas cadreas
sas devotas beghinas sun paghende
daghi ndan pienu cappellas intreas
la sun in sagrestia ammuntonende
babbai senza sa paga non la lassat
pigiat sos chimbe soddos e s’ingrassat.

7
Massimas e segretos de suttana
chi causan orrore e meraviglia
ca sas probas proffessas anzianas
las han domadas a sedda e briglia
custas li servin como e ruffianas
pro attirare sas fizzas de famiglia
cun artes fintas e fines malizias
las marietan e bintran novizia.

8
Contat noviziadu su primm’annu
chi apprendet sas normas necessarias
ben’intesu, adempinde senz’ingannu
a sas tassas mensiles pecuniarias
adempinde cust’obbligu pius mannu
passana effettivas terziarias.
Cunsagradas definitivamente
in custa moda e manera sighente.

9
Su predi intonat una Salmodia
a pro de sa santa istituzione
e…in nome de Gesusu e de Maria
dat’a sos pignos sa benedizione
poi las giamat a sa Sagrestia
e lis ponet…cordone e medaglione
cun cuddas manos suas benedittas
in cuss’iscuscia lis toccat sas tittas.

10
A sa 'ennida 'e sos missionarios
Sardigna religiosa es pro mania
istruidu an rettores e vicarios
buscare soddos de ogni zenia
bendinde a saccos sos iscapolarios
cun su titulu de sa Sant’Agonia
sas missiones lis han dadu fruttu
ca migliaia de franco si c’han giuttu.

11
Santu zelu padrescu cordonianu
in s’agonia e Cristos puru ispiculas
finas bezzos pedrales, casu istranu
an cunfessadu personas ridiculas
sun arrivados in d’unu manzanu
a consumare seschentas particulas
e faghian timinde e las finire
a chie primmu podiat accudire.

12
Po intendere a custos preighende
abbandonian finas sa campagna
in domo e sas devotas rebottende
ite mese an passadu de cuccagna
a sas istaziones pianghende
portados che los han in pompa magna
gridende a meraviglia tottu cantos
custos non sunu padres ca sun Santos.

13
Santu Franziscu l’hat bene pensada
o chi pro “issu semenende ingannos”
una non poder esser azzettada
si no est a su mancus in bindig’annos
igue l’hat sa legge rispettada
evitende pius guaios mannos
ma…a medas su “Dimoniu” la tentau
e…finas de deg’annos nde violentau.

14
Sun mastros meda praticos in s’arte
cun sa professas chi viven in oziu
sas chi giran sa idda e parte in parte
chirchende a chie bintrat in su soziu
cantas pius bind’ada s’istendarte
piusu e lucruosa su negoziu
da su chi ponen sa biddas anzenas
moltiplican sas missas e novenas.

15
Cantas maccas bind’hat po sos cordones
chi banzu in famiglia l’han iscuttu,
trigu, binu e ozzu a buttigliones
a cua de sas mammas c’hana giuttu
su predi, a pische, petta e macarrones
e issas totta chida a pane asciuttu.
E cantas ilghittinde in zoronadas
e medissimas quotas arretradas.

16
Benedittu terz’ordine divinu
de “iscrocconeria” veru intrigu
finas una da sa cotta e mulinu
che lis hat giuttu una mesura e trigu
ca su cuccuri tusu est de continu
nende: chi las suspendet pro castigu
fora modas: ciuffettos e ballare
ubbidire a issu, dare, dare…

17
Subra igue su pedri at ragione
e si bi la negades sezzis locos
semplice: cheret munneddas e zipone
su ch’ispendet podides in fiocos
dadeli tottu a sa religione
ca tenet de campare tantos “procos”
e si no pigian dae ogni parte
serran buttegas e faghen attera’arte.

18
Bi sun sas direttrices graduadas
chi fissan pattos e condiziones
e tenen sas ispias riservadas
iscultende de idda sas pistizones
sas canes avvilidas e mascheradas
cumbessas, fica nasos, e mandrones
chi dogni troddieddu che aggiughides
senza tenner pudore a sos preides…

19
Punt’è riunione est sagrestia
ne consultan sas anacorettas
b’hat cunsizeras de ogni zenia
tottu beniaminas predilettas
ubbidientes a sa madre pia
e cun babbai a sedutas segrettas
po cussu mancu cristos las perdonat
a chie cheret cordone a ch’iscordonat.

20
Su santu “feminescu tribunale”
a su rettore in sa riunione
tott’accusan, sa tale ei sa tale
sian suspesas po punizione
e…a cudda chi cheren pius male
espulsas in su tottu es su cordone
ei sas s’a pagare han coro duru
o pagan o suspesas cussas puru.

21
Isfogadu chi appan su rancore
attenden s’operadu a s’udienzia
sa dominiga, a sa missa mazzore
chi b’est tottu su populu in presenzia
s’alburat’a s’altare su rettore
e pubblicat a tottu sa sentenzia
a nomene, e a sambene giamende
a una a una sas cundennas dende.

22
In medissimos logos b’at rettores
ch’indignan sas popolaziones
critichende persones de onores
pro mira bruttas e ambiziones
so chi non andana sos cunfessores
espulsas che l’as an de sos cordones
cun sas c’han zittadu po sas ratas
ah! Cantas beffas e zantaras fattas.

23
In d’una attera idda, o brutta cosa
su predi a cantu solit arrivare
su cordone at suspesu a un’isposa
ca raida est andada a isposare.
Per Deus Santu, custa est curiosa
Bah! Ch’issu la cheriat istampare…
a sa furca padresca razza mala
su tempus est passadu e “ziu Pala”.

24
A un’attera po odiu fatale
in pubblicu l’hat s’ostia negadu
non permitit su codice penale
ne isco si processu b’at b’istadu
ma … fattu istat chi faticciu male
non ndat in atteru capitadu
imbenugiada pro comunigare
e i su predi s’ostia a li negare.

25
Ca seminan velenu, peste e lua
dae su predi pensad’e fuire!
Beru sa crescia ch’est sa domo sua
ma non potet a nemos inveire,
e tue babbu onu, a fizza tua
ti la lassasa in crescia iscandulire.
Est’ingiuria pubblica immorale
chi la punit su codice penale.

26
Su predi est’in Sardigna istraffutente
atteru che a Parigi e a Tolone
ma…però a lu narrer francamente
ndat sas femminas nostras sa cajone
in bidda nostra isventuratamente
finas omines c’amos in cordone.
E a su ch’intedet “zertas maccas”
senza cordones non cheren teraccas.

27
Sun issas chi sos predis cumpiaghenen
e mere e roccu in cheja las bidides
a modu insoro faghene e isfaghene
ca nachi sun sas “vice preides”
sos preides caglian a tales chi paghen,
(ite mezus dottrina pretendides?)
cun sos preides sun anima e coro
e abbandonan sas domos insoro.

28
In sa Sardigna devotas esistin
chi tenen parentela bisonzosa…
sos parentes insoro no assistin
mentre dan a sos preides ogni…cosa.
Biadu a sos maridos chi resistin
tant'azione infame e birgonzosa!
Ch'han muzeres devotas e credentes
chi pro sos preides cazzan sos parentes.

29
Deo, chi sa Sardigna happo giradu
bidu nd'happo de ogni calidade.
Sos preides sas congregas han fundadu
pro ch'ambin a s'antiga podestade…
Cantu dannosu est unu cherigadu
da-e Podrecca informu nde leade.
Ca sutta s'umbra de Deus e Santos
cheret torlupinare a tottugantos.

30
Ah, cantos nd'happ'intesu sermonende!
De custos cherigados egoistos:
sos gonzos e bigottas aizzende
andare contra 'e sos socialistos.
(In favore 'e sas turbas preighende),
su primu socialista istesit Cristos.
De bos ismascherare est custa s'ora,
bois preighend'intro e nois fora.

Istitutos, Cungregas, Sociedades,
Professu, Gesuita, Preide e Para.
Si custa non sun santas veridades
s'hazis coraggiu nademilu in cara.