No imbecceis prima 'e s'ora
piccioccus de su duamilla!
Est ora 'e dd'accabai
de cundennai is mammas a su disisperu
andendi po su mundu
cun pudesciori de morti;
no si fazzeis sbeliai
de chini si 'olit mali;
it'est custa mania
de fastigiai su buginu?
Torraìnci a su mori!
De meda est arrimàda
cussa ghitarra beccia
sitiàda de umbras
chi circant de badas de 'ndidda pesai.
Feidda sonai; pinnigai is notas
chi hant accumpangiau is canzonis
de is antigus bostus.
Hant portau alliviu, strumbulau s'arrisu
e fattu pillonai froris finas in corus àrridus.
Su meri suu est mortu de diora;
e is cantus cun is notas intrant in is baullus
cun is urtimas memorias:
follas calamadas staccadas de sa matta
chi su bentu di atongiu
provvidit a 'nci scovai.
Ita seis abettendi?
Pigai sa ghitarra e feidda sonai
is notas chi conoscit;
torrai a issa canzonis discoidàdas;
scida o zarachìa!
sa ghitarra est inguni,
pronta a si donai promissas e abettus
e a si fai cumprendì s'arrexoni de bivì,
ca no est asurìa, i a sa primu nota
heis a intendì is fragus allogaus
e is prexus antigus,
i heis a cumprendì cali siat
su veru gosu de biviri
sa stasoni prus bella.
