Caminas in sa notte a lughe Luna
muttis sa gama e iscrutas s’aera
chircas chin s’oju carchi caminera
cantas cun laras siccas sa fortuna

Muda sa luna ascurtat su cantu
su firmamentu est pro te rie rie
luchidas umbras ascurtenne a tie
in terra illongan s’argentadu mantu

Su zeffiru sa chimas muizzenne
sas fozzas tremet lis dat armonia
paren issas cantare una ninnia
a s’anima chi sutta est caminenne

Caminas in sas nottes e caminas
ti firmas cantas e miras su chelu
finzas chi s’aurora ispannat velu
canno su sole issolvet sas frinas

Ti saludat ridente su manzanu
galu sa Luna ti mustrat sa via
arbores montes solu a tie ebbia
chin’Istentale t’istrighen sa manu

sos fiore de campu a unu a unu
s’aperin tottu pro ti saludare
turvas s’armentu pro lu ischidare
astros in chelu non s’idet perunu

Gennaio 2013