(Deghina Glossa)

In ub'est sa sardidade?
Si su Sardu no l’ischides
in sa lughe no bidides,
Sardos, sa limba impreade!

Sa limba sarda dechida
sa favella de sos mannos,
espressat tristos afannos
e su lugore ‘e sa vida.
Prenda est, arte nodida,
contat de s'antiga edade,
contat sa modernidade,
ma cando no b'at favella
in sa limba nostra bella
in ube est sa sardidade?

No bastat chi ‘entulemas
sa bandela de sos moros
de sa Terra in battor oros,
si sos atopos e temas,
arreionos e teoremas
in limba istranza frunides,
gai in s'errore sighides.
Bastante no est s'orgogliu,
no bastat a fagher rogliu,
si su sardu no l’ischides.

Benide, chi bos abberzo
una mundu ispantosu
e undas cardas de gosu
chi sinnent su coro cherzo.
A bois como asseberzo
chi finta petzi faghides
ma sa limba no sentides,
bos l'azis ismentigada,
in coro l'azis cuada,
in sa lughe no bidides.

No bidides sa bellesa
ch'est cuada in cussu mundu
azis cuss'istiga in fundu
no bistedas in mudesa!
No epedas sa pretesa
d'esser sardos a metade!
Imparade e faeddade
sa limba chi azis sutu
sa chi dat su durche frutu,
Sardos, sa limba impreade!

1° Premio alla V° Edizione del Concorso di Poesia “Damus boghe a sa Limba Sarda”
Alà dei Sardi, 30 12 2023