Cando sas mamas nostras nos ninnìana
cantende cun sa bella limba issoro
sas paraulas bellas chi narìana:
dormi sienda mia de su coro.

Cantend'a boghe manna s'intendìana
in carrela ninnende su tesoro
sa ‘oghe in totue si daìana
Caddura, Campidanu e Logudoro.

Cun sa matessi ‘oghe e cun manizu
totugantu s'impignu bi ponìana
sa limb'issoro imparend'a su fizu.

Beniat cuntentadu su disizu
si su fizu creschinde giamaìana
cun sa limba ‘e sa mama rispondìana.

___________

Como chi tenes nebodes in canna
a sa ‘etzesa ses vivind'in pena
sos nebodes faeddan limb'anzena
e no cumprenden pius sa onnamanna.

Sètzida in su banchitu in sa janna
isgranat de rosàriu sa cadena:
vicinu a su nebode it'iscena;
giamèndelu in sardu a boghe manna.

Gia si cumprenden a s'imbola imbola
prommitinde sempre chi una die
impàrene su sardu in s'iscola

Si sa limba impàrana inie
dae s'iscola ndi essin'educados
cun limb'issoro e de sos antenados.