A tie ‘ido in dolu. Alas cun su ‘entu,
una man‘eo ti do e fiores.

Mi das ancora alenos e premores
e nd’apo proa in sentidos serenos,
premores mi das e ancora alenos
in sentidos serenos nd’apo e proa,
che die noa a coro mi los leo.

A tie ‘ido in dolu. Alas cun su ‘entu
ti do, una manu e fiores deo.

Como a sas grascias de sos ojos creo
e sas bellesas tuas ti fentomo,
de sas grascias creo a sos ojos, como
ti fentomo de sas bellesas tuas,
de lughes duas, de oro però.

A tie ‘ido in dolu. Alas cun su ‘entu,
una man‘eo e fiores ti do.

Accò su sole chi t’est notu, accò
est in saludu e in paghe cun totu,
accò, accò su sole chi t’est notu,
in paghe cun totu est e in saludu,
millu s’agiudu, milla sa fortuna.

A tie ‘ido in dolu. Alas cun su ‘entu
deo ti do, fiores e manu, una.

Dies bellas in cara nd’apo in d-una
si mi mustras imprentas che istellas,
in cara nd’apo in d-una dies bellas
che istellas si mi mustras imprentas
a tie tentas che sole ’e beranu.

A tie ‘ido in dolu. Alas cun su ‘entu,
flores deo ti do e una manu.

Sas nues in chelu andan a pianu
figuras paren chi sian d’anghèlu,
andan sas nues a pianu in chelu
paren d’anghèlu chi sian figuras
e bonas uras semper nd’as in palas.

Una man‘eo ti do e fiores
a tie. Cun su ‘entu ‘ido in dolu alas.

In pasu como chieta ti falas
e a furu ti nde leo unu ‘asu,
como chieta ti falas in pasu
e unu ‘asu ti nde leo a furu
ca so seguru, chi non ti nd’ischido.

Una man‘eo ti do e fiores.
a tie. In dolu alas cun su ‘entu ‘ido.

A manu tenta cun tegus m’achido
e ballende ti nde pesas cuntenta,
m’achido cun tegus a manu tenta,
cuntenta ti nde pesas e ballende
ca mi ses dende cun passos apentu.

Una man‘eo ti do e fiores.
Cun a tie ‘ido alas, su dolu in ‘entu.

Afaca t’isto unidu in sentimentu
cun notas e non t’ido mai istraca,
in sentimentu unidu t’isto afaca
e mai istraca non t’ido cun notas
ca las adotas las cantas a mie.

Una man‘eo ti do e fiores.
Cun dolu ‘ido alas, in su ‘entu a tie.

Cun istrinas mi cuntentas sa die
e colores e risos chi presentas
istrinas, cun sa die mi cuntentas
chi presentas, e colores e risos
sempr’as acisos in cara e non solu.

Una man‘eo ti do e fiores .
Alas cun su ‘entu ‘ido, a tie in dolu.

Cun fiamas das oras de consolu
e mi sun caras in coro ca m’amas,
das oras de consolu cun fiamas
ca m’amas, e in coro mi sun caras
e semper giaras ti dan isplendores.

A tie ‘ido in dolu. Alas cun su ‘entu,
una man‘eo ti do e fiores.

Premio Letterario Osilo 2013 - 2° Premio Sez. in Rima