Sa mapa de Sardigna
di Vittorio Falchi

Cando ti miro in sa mapa
Sardigna minoredda paris nudda,
paris sena valore o interessu
inghiriada de abba
cun pagas biddas mesu ispobuladas
e caminos istrintos chi a calaizu
las ligat a una a una
traessende a fadiga
baddes abbandonadas
e desertas campuras
ue creschet mudeju e cherchizone
e trettu trettu piantas de pirastru
meriagu a corroncias in s’istiu.
Paris nudda Sardigna
e nudda est cuddu puntu
chi cheret figurare
sa ‘idda mia esposta a bentu
geladu de travuntana.
Eppuru ti carigno in onzi parte
cun sa mente torrende a sa Campeda,
su Monte nostru regnu de pastores,
a sas binzas de su coddu ‘e Perru,
a su Campu, immensu lagu
de trigu friscu, profumadu.
Gai carigno de su Campidanu
s’istriscia piana, birde, reposante,
sas alturas de Desulu e Tonara
e sas puntas bentosas de Ollolai,
cuerru de sos ultimos murones.
Paris nudda Sardigna
pintada in su pabilu:
battor roccas chi essin dae mare
sempre ispuccida e tenta in minispreju
dae denigradores furisteris,
dae fizos ingratos chi has in sinu.
Pro me ses troppu cara
Sardigna minoredda ch’in sa mapa
accabarro cun d’una manu sola
che cosa preziosa
ch’appartenet a mie totacanta.

24 de santandria 1978