Sa medalla a su valore
de Tonino Fancello

De sa secunda gherra‘onzi lamentu
bos conto in custa sera frittulana
donzi dolore intessiu‘onzi turmentu

Trazo unu mannu pesu chene gana
chin sos sinzales de sa pizzinnia
sempere in carrozzella in custa tana.

Che unu relittu ‘e sa gherra finia
e partiginas lacrimas de prantu
mudas in sa carena irvania.

Bos’isterro su contu in d’unu mantu
e sa medalla mustrat sor valores
de cudd’era chi bramat sol’ispantu.

Potto contare a mannos e minores
desse’iscampau in su trinzeramentu
in prima linea a bombas e terrores.

Isparande a nazistas contra bentu
ruttu so-e in su nive, e so-e chistidu
in maladias de su conzelamentu.

Prenu‘e caentura tott’affrittoridu
lassand’amigos in lampos de oghu
a s’ospidale ruttu m’an battidu.

A che torrare a inoghe non fit zoghu
chene bratzos ne ancas e nen pese
como so-e inoghe settiu zegu a toghu.

Iscampau a sa sorte tue sese
mi naran topu arzu e a su manizu
de cussas lunas nieddas de su mese

Cando conto s’istoria a carchi fizu
e lastimo cumpanzos de sa gherra
mi naran ...tue ses-biu... in martirizu.

Ma pessa cantas rughes son’in terra
cantos sordados mortos chene tumba
cantas pessones orfanas de gherra.

Iscurtana pranghende s’innu a trumba.

1- premio concorso di poesia sarda Oniferi Maggio 2003