SA MESA ‘ E SAS DUDAS

Chirco umbras biancas de consolu,
in sas iscias astradas de s’anima,
pro mi carignare pizos de solidade.

In su campusantu ‘e sos sonnios
cheria torrare a criadura,
a cuddu sabore de sa ua furada,
a sos tichirrios de unu cua-cua,
a chertos e iscurrizadas a bentu.

Sa morrocula ‘e sa vida
hat lassadu istearicas de piuer,
e mattulos de cagarantu isfozidu,
in sas manos cancaradas de isettu.

Corvos arestes han istratzadu sas peraulas,
dae su vocabolariu ‘e s’afficu.

In su primu tuddu ‘e su sero
aparizo s’aradu ‘e su eranu,
apparende sas giuntas a chelu,
pro cumbidare primores de sorte.

Hat a esser mai gai?

Forsis......

In sas mesa ‘e sas dudas
so rebottende istasero.

UMBRA

Giovanna Maria Lai Dettori (Ozieri)