Sa morte
di Vittoria Calzaghe

Nachi ses niedda fea acrinzida
chi zertu non somizas a una dea
ponzende sos chi restan' in pelea
faghes paura e non cheres bida
cha truncas su raportu cun sa vida
e pro cussu ti naran chi ses rea
sempr'in giru in sos logos chirchende
dogn'essere umanu ti ses lende.

Morte pruite? faghes arrabbiare
pro piaghere allontanadi dai me
pius non ti atrives innoghe a ponner pe
cha non ti chelzo ider'o incontrare
m’hana nadu chi cheres cumandare
ma deo non so un'amiga pro te
cando t'ammerias a chie leare
no lu mollas, no lu lassas istare.

Tue morte fiera e incrudellida
non miras giovane, né anzianu
los leas sempre malaidu o sanu
e binches sempre tue sa partida
narami pruite? ses gai accanida
bi cheret zente chi ti ponzat manu
in dogni logu ses fatende dannos
meritas chi t'aconzen pro sos'annos.

Arrivis a sa cua muda, muda
niunu t'ha mai idu né intesu
paret chi sentan solu unu pesu
e pro cussu ti giaman morte cruda
cha ispozas e lassas'a sa nuda
e chie restat n'istada offesu
e canta zente pones in pelea
ses brutta, iscarenada, niedda fea.

A lischis cantu a mie faghes faltizu
in su modu chi ti leas sa zente!
e cando mai! tue n'de ses dolente
separare una mama de un fizu
trunchende ogni bene ogni desizu
de babbu, mama e ogni parente
morte non sias gai impiedosa
inserrende sas vidas in sa losa.