Sa 'oghe de su mudine
de Maurizio Faedda

Si haisti una ‘oghe a l’alziare,
a la pesare a bentos che chijinas
chi si falen in terras annijinas
a franca abberta a be-i semenare
su cherrer bene, s’amore e s’amare
pro chi fuat su male a perdijinas.

Tue ch’in coro in sos tempos inserras
uras de malu fadu e tribulias,
murrunzos chena seru e balentias,
chiettas possa manna e no inzerras
iscabadas isentas cuntierras
ca ses pro paghe e bene in rialias.

E in su pensu in sentidos funguttos
che ghìndalos ti ghindan sos forrojos
e a risu segadu, isfustu in ojos
has incunzadu dolores e luttos
a cantilena sos matessi muttos
pro segare trobeas e trobojos.

Giughe sas rughes chi t’han postu a palas
cun sos framengos chi has in meledu
dadu chi dodes no has in eredu
ma de piantu sas baddes chi falas
a tie chi mutzadu coa e alas
t’han e cagliadu ti tenen masedu.

Sa ‘oghe chi no has e tias cherrer
chi fintza a oe t’est arressa in bula,
ìntrala che arados in sa tula
sos beraniles a sulcos abberrer
ìnnida e bia attesu a che ferrer
a sos masones paschende in s’istula.

Pone s’atza rebelle totta incrine,
campanas e matraccas a tzocheddos
cun son mùrinos frades e nieddos;
faghide a fischinidas su mudine
e in sos biradolzos chena fine
chi bos torret sa ‘oghe e sos faeddos.

A sos chi ‘ettan lua e abba cralta,
càrian sos isciaos in runzones
in sos mares, in padros e chizones,
a lis narrer bazide a boghe alta
chi sensen a sa terra ‘e fagher falta
e tòrrene masedos che anzones.

Premio Speciale Poesia Tradizionale - 6° Premio di Poesia Sarda 2a e 3a Circoscrizione – Comune di Sassari