SA PAGHE

Cant’est bella sa paghe in onni coro,
grassia divina, donu istimadu,
est rara virtude in su criadu,
in su mundhu no b’hat mezzus tesoro.

Balet prus de prata e prus de s’oro
in familia, in biddha, in onni istadu.
Babbos e mamas han semper pregadu
chi la tenzeren sos fizos issoro.

Fortunadas e riccas cuddhas terras
ue biven cuncordos sos omines
sena brigas e sena cuntierras.

Amore bi bundhat e amistades,
allegrissias chi no tenen fines,
cando sa zente s’istimat che frades.

Iscanu, 4-10-1996