Sa Palinuro
di Salvatore Ladu

D'eris pomposa, braghera e sigura
Cun pettorras d'attarzu, lena-lena
Ispinta da un' ala 'e ventu prena
In die soliana o nott'iscura.

Sa luna, sos isteddos, in caminu
T’assicuravan, crarura in s'andare
Banziga'da sas undas de su mare
Cun sos ch'aias inserradu in sinu.

Sa lughe netta 'e sos profundos chelos
Ti pintava che umbra in mare apertu
In cussu mundu chi as iscupertu
Cand'andavas trazzà da battor velos.

Gravidas da Libecciu e Maestrale
Randa, vroccos de prua e sa Maestra
Pro ti faghere andare pius lestra
Tad’ ifustu undas a sapore 'e sale,

Cand'attopavas in s'aspru caminu
Fruttu 'e su proghessu “vumajola”
Sos fizzos tuos de antiga iscola
Cun rispettu, ti faghian s'inchinu.

E calchi olta ti fatta ischire
As fattu pur'a mie escola 'e vida
Muconoseddu, nudu a primm'issida
Insinnandemi it'est gosu e patire.

Oje non curres prus iscadenada
Sos biancos lentolos sun'istrazzos
Poi d'annos chi brunzinados brazzos
T'an presa in portu, tottu ruinzada.

Pur'in cue, de tottu non ses morta
Barbudos, pilicanos si cuntentana
De ti fagher bisitta, ca s'ammentana
De custa, e dei cudda atera orta.

A risu in coro, laras tremulande
Ojos istraccos da caentu 'e frittu
Infunden pazineddas, chi hana iscrittu
Cant'in cara sun lacrimas sulcande.