Sa poesia
est filu inzamadu
dae atzolas de nues jaras
chi su 'entu imboligat
intro caminos de bisos.

Toccheddat sa janna
de onzi ischire,
chei una mariposa
chi s'arrimat subra unu fiore
dae sa cale tràghet balia.

Sa poesia
est recattu,carignu,
ispaju pro s'anima
chi no imbetzat,
ma naschet de nou
e in sinu sou
agattat cunfortu e aggorru.

Sa poesia
cosit sas attas
chi ligan a pare sos ammentos
o suguzat
su trigu 'e su coro anneadu
dae fressadas de disamparu.

Sa poesia
est cherta 'e s'identidade tua,
dilliriu,amantia illaccanada,
assussegu chi s'ispaniat
in sa grussària intippia
de s'esistentzia.

Sa poesia
est ermosura 'e sentidos,
boghe de paghe...
littera 'e amore,
indiritzada a su mundu!

Menzione d'onore sezione versi sciolti al Concorso di poesia in Lingua Sarda “Sant’Antoni de su o’u” - Mamoiada 19 Dicembre 2021