Caminende in custa vida
arranco, in chirca 'e amparu.
La ‘ido comente isfida

ca nudda 'e totu m'est giaru.
Aizu bi sun colores,
e mancat su pius raru.

Pensaia a sos fiores,
naschidos in su creadu
gia-i privos de lugores.

Cussu chi m’at amagiadu
est sa rosa sena ispina,
chi niunu m’at donadu

ca m’an giutu sa canina.
Ite dolu nd’apo tentu,
s’a sa movida ‘e sa frina

est sighidu su lamentu;
de su coro in sa carena
chi fut sena nutrimentu.

Sa vida mia est in pena,
isetende unu carignu
chi mi tocchet che sirena;

e d’abratzu lasset signu.
Issa est mere de su mare,
deo sigo su disignu

chi m’impedit de nadare.
E in terra mi nde torro,
sighindela a suspirare.

Custa rosa nde l’aborro,
tantu ch’a su primu ch’ido;
in sa manu bi l’aporro.

Puru si sa vida isfido,
nudda ‘e custu deo cherzo,
e a su bisu m’ afido.

Ca su sonniu preferzo
a una vida ispinosa
e mancu manu bi ferzo.

Narami ite, mariposa
ses chirchende de costou?
Istegiadi da’ sa rosa,

‘oladiche a logu nou.
Ca si ti punghen sas alas
as finidu ‘e fagher prou.

E da’ chelu non che falas,
ca non b’at ite patire;
in aeras gai malas

non podes tue finire.
Da’ sa rosa no at sensu,
chi tue depas sufrire!

Terza Classificata Sezione Poesia Logudoresa al “Premio Letterario e di Poesia Città di Olbia” Anno 2015

Giudizio di Antonio Canalis per sa poesia : Sa rosa canina.

Terzinas cantilenantes de pessimismu chena lacanas.
Metafora in suspu chi medin s'andera de una vida ispinosa.
Ca finas sa rosa est piena 'e ispinas e ponet in 'ardia sa mariposa a che 'olare atesu.
Si s'ispina li punghet sas alas nde ruet a mulinadura
e, si no est menzus sa rosa canina assunessi non giughet ispina......