SA SARTIGLIA
Di Lorenzo Brandinu

Musica in Aristanis e poesia
pro ammajare su tempus benidore
duos alfieris chin su bandidore
avisan chi sa cursa est imminente
in sos caminos banzigat sa zente
e in su piatzale de santa maria
cavaglieris e caddos a sa briglia
ca est sa esta manna ‘e sa sartiglia

in sa mesita sun sas massajeddas
l’ana bestidu e l’an postu su belu
che santidade chi falat dae chelu
componidori est misticu e divinu
movet senza isfiorare su terrinu
a sonos de tamburos e launeddas
beneighet chin fede e chin coraju
tenende in artu sa pipia ‘e maju

sun chentuvinti totus caratzados
a sa ritza currende in sas groperas
a tres a tres ischitzan che panteras
cavaglieris e caddos in s’intesa
brincan e giran, torran a sa presa
che coetes de fogu infiamados
milli provas fatende milli volos
a tintinnos d’ischiglia e sonajolos

an caddos baios trighinos biancos
bardaos e lustros pro sa passerella
deretu nd’an iferchidu un’istella
in sos caddos a bolu che a giocu
an puru fatu centru chin s’istocu
premende sos asprones in fiancos
sun vera ratza sarda non runzinos
paris triunfan caddos e fantinos

aplausos e saludos in s’istrada
e in su caddu s’istendet chin aju
semper in artu sa pipia ‘e maju
curret componidori a sa mesita
sas massajeddas manu beneita
l’ispotzan pro ca finit sa remada
lassat cilindru, mascara e su belu
torrat profanu a terra dae chelu

* mesita -luogo sacro per vestire e svestire il componidori(capocorsa)-
**massajeddas-fanciulle in costume sardo-
***pipia de maju- mazzo di fiori sacralizzato simbolo di prosperità e fertilità-

Secondo premio al concorso di Dorgali 2023