SA TEMPORADA ‘E SU DESTINU

S’ispiglione ‘e sos sonnios
isorvet pilos de ammentu,
e sighende passos de entu,
aberit ventanas de ispera,
pro mudare chirriolos de ura.

Sa temporada ‘e su destinu
hat lassadu basos de braja,
e carignos de astrau,
in intragnas de coro.

In pinnicos de campanas ammudadas
riet su sonu ‘e sa vida,
bentulende sa sorte,
cun francas de iddia.

E leat bolu su pensamentu,
in campedas de chimeras chena cara,
e uddit forte su coro,
chirchende undas noales de consolu.

Ma torrat luego su tuddu fittianu.

Che mariposa imbreaga de entu,
mi perdo in rodones de solidade.

Giovanna Maria Lai Dettori (Ozieri)