Sa terra nadia
di Salvatore Enne

De sa idda chi naschid’apo tentu
bos zuro chi nde so innamoradu
ca er bidda fiera e de artu gradu
ca er bundante de onzi san’alimentu.

Sa zente in bidda mia est cordiale,
no ba de dubitare mancu appena,
ca offrini a s’istranzu bustu e chena,
pro s’amigu er fiera e ospitale.

Sa zente er bona e bon’est su terrinu
lettore caru resta persuasu
nor dad in abbundansia pan’e casu
e bon’amos petta, ozzu e binu.

S’aera er bona e pius de una sorgente
isgorgad abba frisca, ite bellesa,
pro cussu in sa idda Olotanesa
sos chent’annos che passad meda zente.

Sos gallos, s’onestade, sa passenzia
sun dotes ch’ad sa idda in cantidade,
lu mustran puru in s’universidade
sa grandesa de sa nostra intelligenzia.

Sa fratellanzia, sa paghe, s’amore
so cutentu Bolotana ca tenes
e cantu durad mundu lu mantenes
cun tanta fama e cun pius onore.