Sa tirania amorosa
di Paulicu Mossa

1.
Ingrata, sas promissas no fin custas,
Ne-i custa fit paga de mi dare:
Deo dia su samben terramare
Pro non ti dare un'umbra de suspettu;
E tue tropp'ingrata a tant'affettu
Pro gustos de niente mi disgustas.

2.
Ingrata, tue macchinas ruinas
E pretendes ch'in lagrimas m'instrue;
Ahimè, troppu tardu isco chi tue,
Giughes rosas in bucca, in coro ispinas!
Ahimè, senza duda determinas
De mi fagher sa mente regirare.
Deo dia su samben terramare...

3.
Chi da-e me su seru ölet tejanu,
O chi morza de affannu, intentu gughes:
Neghes, t’istrosses, ti ponzas in rughe,
Tott’est inutilmente, tottu est vanu:
Proas hapo lampantes a sa manu,
Chi solu godis in su mi disgustare
Deo dia su samben terramare...

4.
Disgustos de non dare a un'amante,
M’has dadu cando mancu lu creia;
E deo fortunosu mi tenia,
Amende pro sinzera un'incostante;
Però como proadu hapo bastante
Ch'in feminas non b'hada ite fidare.
Deo dia su samben terramare...

5.
Ponner bundu in feminas est lucura,
Ca est tirannu su trattare insoro;
S'ischin chi de s'amante sunu in coro,
Chircan dare a s'amante ogni margura;
E chi sias goie o piùs dura,
Tue, ingrata, non podes dennegare...
Deo dia su samben terramare...

6.
Non podes un'iscusa ögare appizzu,
Pro chi mustres ingiustu su lamentu;
Ca istas meledende ogni momentu,
Maneras de mi ponner in fastizu.
Eà chi so perdinde ogn'assimizu,
Pro cantos mi dàs tragos a passare!
Deo dia su samben terramare...

7.
Tragos crudeles a sa disessida
Mi dàs, e no nd'ammellas uno die;
Et eo, ingrata, pro amare a tie
So passende in arriscos de sa vida.
Da-e cal'aspr'iscogliu ses naschida?
Cale tigre t'hat potidu allevare?
Deo dia su samben terramare...

8.
Cale noa terribile Gorgone,
T'hat in preda su coro trasformadu?
Chie t'hat cun tant'arte ammaestradu
In s'iscola de ogni finzione?
Ahi, sa dura situazione
In sa cale so ennidu a parare!
Deo dia su samben terramare...

9.
Bennidu so a transitos de morte,
Un'inferru pro te in vida pro';
Solu pro chi m'affligias zertu so,
Ch'a sos emulos mios faghes corte:
Eppuru pro sa mia mala sorte,
Un'ora senza te no pot'istare!
Deo dia su samben terramare...

10.
Istare senza te a perun'ora
Non podet custu tristu coro meu;
M'est velenu e mi servit de affeu
Mirare attera ninfa, nè pastora...
T'amo, ingrata, fingida e traitora,
Chi chi esseras sinzera in m'istimare! ...
Deo dia su samben terramare...

11.
Finis, chi lesse a tie no est cosa;
Amorosa t’amesi, ingrata t'amo;
T'amo... e amende a tie solu bramo
Finire custa vida angustiosa.
E s'aman sos defuntos in sa losa,
Ancora sende mortu t'hap'amare!
Deo dia su samben terramare...

Pro non ti dare un'umbra de suspettu;
E tue, tropp'ingrata a tant'affettu,
Pro gustos de niente mi disgustas!
Ingrata, sas promissas no fin custas!