In messu ‘e sa bidda t’an fraicada
Cara a “Sa Matta” e a “Nunnale”
Esposta a donzi bentu infernale
Indomita abbarras innaltzada.

Chimbe pianos de forma quadrada
Mastros balentes t’an dadu
Preda granitica an seccadu
Pro esser in su tempus cunservada.

T’adornan battoro campanas
Chi sonan a mortu e in allegria
Son sas campanas de Santa Maria
Chi rallegran estas sacras e profanas.

Gigante miras su chelu e sas campagnas
E intennes de sa bidda sos lamentos
Sos piantos mulinados dae sos bentos
E in su granitu ti gullis sas intragnas.

Su rellozu mirat Cadone”e “Parraghine”
E puntuale sonat a donz’ora de sa die
T’ammentat de mannicare a messudie
E a messanotte chi est ora ‘e dormire.