Comente est in su mare s'abba o s'unda,
pàsida a bortas, a bortas metzana,
gai sa vida lughet risulana
o cun alas de dolu faghet runda.

Sos bisos sunt fiores e mamentos
chi jogant a brotare in sa traschia,
ma si ch'allizant totu a una 'ia,
zagarados dae fùrridos bentos.

Addaghi sèmeno isperas a ranu
in surcos a pintirinos de 'iddia,
e parent mortos sos friscos isticos,

s'amore in coro est un alenu e 'eranu,
mi ponet torra su sentidu in cria
e torrant a brotare sos aficos.

3° Premio alla 1° Edizione del Concorso di Poesia “Serafino Masala”
Bultei, 09 09 2023