SA FURA DE SA VETURA
di Mario Sanna

Sa vetura m’as furadu farabutu
Pro ti la jocare cun sos buratinos!
Ti si potat bortulare in sos caminos
Dassende sos familiares totu in lutu.
A cale siat trocu chi apes iscutu
Ti nche bochent cantu a cantu a cutzirinos.
Comente est s’auto me posta male
Sias tue pistu totu fatu a sale.

Cantu ‘e sa vetura nd’aia bisonzu
A mi mògher intro ‘e custa tzitade
Sias totu bida in carena iscontzu.
Nessunu mai nd’apat piedade
Nemancu ti diant pane cun agonzu.
Peri chi campes chent’annos in edade
Restes che cane abandonadu e nudu
Nemos ti diat una manu ‘e azudu.

Cando mai t’apo a perdonare
Si non mi la torras totu sana intrea
Chi pota a nobu torrare a biazare
Non mi dasses totu sa bida in pelea!
Si l’as picada pro ti disaogare
Zentile nessi l’apas custa idea
De mi la torrare a su matessi tretu
Nessi intro ‘e chida si non podes deretu.

Su mere de sa Y10