Saludos e cumplimentos sintzeros
de Antonio Altana

So gia paritzu chi ti so messende
setzidu in cadrea a un'ancuju,
ma oe ti lu lasso unu mannuju
de grascias mannas e de cumplimentos
pro totu sas incunzas de talentos
chi sempr'as dadu e sempre ses dende.

Cussorza de imbicos culturales
e giaga abbelta pro lacanas noas.
De contos, poesias e de proas
chin raru gustu postas sempre in giaru
cun insinzos chi as tzertificadu
pro totu nois poberos mortales.

Gia l'isco chi non balet un'azigu
a narrer- como ti lu paghet Deu-
Ispero solu chi s'iscritu meu
potat dare un'alenu a cussu coro
chi mustrat canta prata e cantu oro
at unu mastru cand'est beru amigu.