Su sinnu chi nde trazas arestau
de mill’istirpes sardas anticorias
in gherras d’invasores est cravau
in sambene cazadu‘e paristorias
Platone tat chircau e tat bantau
chin milli turres po ti dare grorias
ca intro sos nuraghes chi nd’amattas
isticchis de Atlantide sas trattas.

Sardigna chi su coro tan feridu
cartaginesos turcos a orizontes
in Tiscali su poppulu est peridu
po si diffender’interi sos montes
bandidos in su prattu t’an servidu
bardanas e sequestros in sas frontes
arrumbas in su poppolu mescrada
che isula prus bella battisada.

S’arcadia s’anticoria bene fatta
sos galu ritzas in pontes romanos
miliares in Viniola po sa tratta
predarios in caminos fittianos
un’ispagnola pesta t’at irfatta
t’at irmesau iddatzos de mundanos
commo nde godit salude su sardu
chin ervas bonas e mattas de gardu.

In d’unu mare riccu cristallinu
t’apojas che una fada in d’una duna
in s’anima Shardanas in su sinu
e lunas sas cumpanzas de fortuna
e chin barones in cussu caminu
nde trazas sas istorias chent’e una
Casteddu Sardu it po sa tirannia
e Burgos a presone d’angustia.

Sardigna terra cara groriosa
chin sa Dea madre e milli gherreros
milli reffertos ti pintan che rosa
de anticos monumentos gal’interos
e oje jeo ti conto carchi cosa
ca semmus fizos tuos vardaderos
ca asco‘e tene custas cosas caras
appas fortuna chin annadas raras.