Sas campanas de idda mia
di Vittoria Calzaghe

Sun bellas sas campanas de idda mia
A las'intender suni un'acisu
Cha paren melodias de paradisu
Ponzend'in coro a tottu allegria
Su sera sonan pro s'Ave Maria
In dogni domo bad' unu sorrisu
A chena si riduini sa zente
Pro su cuntentu de ogni parente.

Saludan'a sa fatta de su die
Su bongiorno rivolt'a tottugantu
Iscultendalas suni un'incantu
Gioiosas saludende rie, rie
Allegria non dona sol'a mie
Ma suni prò sa idda un'ispantu
Sonende prò sa zente a dogn'ora
Contente una forza protettora.

Pro su paese una grande cosa
Giaman'a chegia ogni laerresu
Arrivin dai vicinu e atesu
Pro ogni funzione religiosa
Sonen cu boghe allegra o piedosa
Currid'ognunu puru send'offesu
Lacrimas versan de piantu sinzeru
Si tristes sun sonende un'isperu.

Sonan'a mortu senza si frimmare
Pro saludar'a chie nos at lassadu
Paren'unu lamentu accoradu
Chi faghen sa carena irpillare
A toccu e mortu pro l'accumpagnare
Gai su defuntu enid'onoradu
No es comente sonare allegria
Es triste e fea cusso melodia.

Devotos tottu a Santa Margharida
Cha de sa idda issa es sa padrona
Fideles la pregamus dai sa trona
Chi tenzat custa zente sempr'unida
E pro cantu duramus'in sa vida
Ogni mancanzia nostra nos perdona
Sonende sas campanas'a disterru
Allegras pro su populu laerresu.